Олунньу 21-23 күннэригэр Сунтаарга Николай Тарскай кэриэһигэр көҥүл тустууга биирдиилээн уонна хамаанданан бастыыр иһин өрөспүүбүлүкэ таһымнаах чөмпүйэнээт буолаары турар. Быйылгы чөмпүйэнээт биһиги киэн туттар биир дойдулаахпыт, Арассыыйа уонна ДНР Дьоруойа Дмитрий Егоров төрөөбүтэ 50 сылын чэрчитинэн ыытыллыаҕа. Чөмпүйэнээккэ өрөспүүбүлүкэ ааттаахтара 19 улуустан 200-тэн тахса бөҕөс көбүөргэ күөн көрсүөҕэ. Күрэхтэһии 10 ыйааһыҥҥа ыытыллар. Бөҕөстөр ортолоругар көҥүл тустуу эйгэтигэр ааттара үгүстүк иһиллибит, өрөспүүбүлүкэ күүстээх бөҕөстөрүнэн биллэр спортсменнар үгүстэр. Ол курдук, Тааттаттан Федор Постников, Чурапчыттан Константин Капрынов, Чурапчыттан Олег Фомин, Мэҥэ Хаҥаластан Никита Хабаров, Хаҥаластан Даниил Иванов, Ньурбаттан Александр Авелов уо.д.а. көбүөргэ тахсыахтара.
Оттон көҥүл тустууга аан дойдутааҕы кылаастаах успуорт маастара, тустуук Ньургун Скрябин Мэҥэ Хаҥалас улууһун көҥүл тустууга сүрүн тириэньэринэн ананан үлэлии сылдьар. Кини Мэҥэ Хаҥалас хамаандатын салайан илдьэ кэлиэ.
Биһиги улууспутуттан Александр Болуров, Юрий Винокуров, Денис Игнатьев, Кэскил Семенов, Александр Фокинов, Анатолий Иванов, Давид Чириков, Алексей Данилов, Сандал Горохов, Владимир Данилов, Николай Охлопков, Айсен Килибеев уо.д.а. тустуохтара. Ону сэргэ улууһун аатын, хамаандатын чиэһин көмүскүү Нюргун Сергин кэлэр. Бу туһунан улуус көҥүл тустууга старшай тириэньэрэ Николай Данилов иһитиннэрдэ.
Улууспут хамаандатын Николай Даниловы сэргэ Станислав, Виталий Яковлевтар сүрүннэн эрчийдилэр, дьарыктаатылар. Күрэхтэһии кылаабынай судьуйатынан Вячеслав Кривошапкин үлэлиэҕэ, ону таһынан РФ тустууга федерациятын бэрэстэбиитэлэ Сунтаар Сиэйэтиттэн төрүттээх Николай Николаев кэлэ сылдьар. Кини бу күрэхтэһиини көрүө-истиэ, бөҕөстөр тустар ньымаларын, кылаастарын сыаналыа.
Манна даҕатан эттэххэ, Н.Н.Тарскай кэриэһигэр чөмпүйэнээт 2017 сыллаахха биһиги улууспутугар ыытыллыбыта. Манна эмиэ 200-чэ бөҕөс өрөспүүбүлүкэ 16 улууһуттан түмсэн тустуу түһүлгэтин киэргэппиттэрэ. Ол сыллааҕы «Сунтаар сонуннара» хаһыаппытыгар А.И.Иванов аатынан олимпийскай эрэллэри бэлэмниир спортивнай оскуола манеһыгар буолбут чөмпүйэнээккэ кылаабынай судьуйалаабыт Аркадий Тастыгин: «Араас күрэхтэһиилэргэ судьуйалаан элбэх улууска сырыттым да, маннык үгүс көрөөччүлээх күрэхтэһиини көрө иликпин. Дьоҥҥут-сэргэҕит бу курдук түмсүбүтэ, кыайыыгыт биир олуга буолла дии саныыбын» диэн бэлиэтээбитэ суруллубут. Ол курдук, биһиги Сунтаарбыт хамаандата бу 2017 сыллаахха ыытыллыбыт чөмпүйэнээккэ бастакы миэстэни ылбыта. Онон доҕоттоор, бу да сырыыга манежка хото кэлэн, өрөспүүбүлүкэ ааттаах-суоллаах тустууктарын киирсиилэрин көрүҥ-сэргээҥ, дьоммутугар «ыалдьан», кинилэр күүстэригэр күүстэ, кыахтарыгар кыахта эпсэн кыайыыга дьулуһуохха. Оттон былырыын Уус Алдан Бороҕонугар, 2023 сыллаахха Чурапчыга буолбут чөмпүйэнээттэргэ Сунтаар хамаандата ситиһиилээхтик кыттан турар. Ол курдук, хамаанданан үһүс миэстэ буолбуппут.
Чөмпүйэнээт бырагыраамата:
Олунньу 21 күнэ: Дэлэгээссийэлэр кэлиилэрэ
10:00 — 16:00 -Мандатнай хамыыһыйа
16:00-17:00 Хамаандалар бэрэстэбиитэллэрин кытары судейскай кэллиэгийэ сүбэлэһиитэ
17:00-17:30- Сэрэбиэй
Олунньу 22 күнэ:
08:00-08:30 — ыйааһыннаныы
10:00-16:00 – Күрэхтэһии
16:00-16:40 – Чөмпүйэнээти үөрүүлээхтик аһыы
17:00-19:00 – Полуфинальнай киирсиилэр
Олунньу 23 күнэ:
08:00-8:30 – Ыйааһыннаныы
10:00-14:00 – Күрэхтэһии салҕанар
14:00-16:00 — Тохтобул
16:00-20:00 – Финальнай киирсиилэр, наҕараадалары туттарыы.
Николай Тарскай кэриэһигэр ыытыллар чөмпүйэнээттэн иһитиннэриилэри, устуулары, хаартыскалары биһиги @suntaar_sonunnara Телеграм канаалбытыгар киирэн көрөөрүҥ, истээриҥ, ааҕаарыҥ.
Яина ВЛАСЬЕВА
Хаартыска интэриниэт ситимиттэн туһанылынна