Бүгүн, кулун тутар 27 күнүгэр, С.А Зверев-Кыыл Уолун аатынан норуот айымньытын киинигэр хомус Аан дойдутааҕы түмэлин салаата үөрүүлээхтик арылынна.
Бу дьоро күн күндү ыалдьыттарынан буоллулар хомус Аан дойдутааҕы түмэлин уонна киинин дириэктэрэ Дмитрий Бястинов, хомус Аан дойдутааҕы түмэлин уонна киинин пуондатын сэбиэдиссэйэ Вера Бурнашева, хомусчуттар Альбина Дягтерева, Андрей Алтунаров, Светлана Харлампьева, Августина Евсеева, уонна Утум уус Иван Павлов.
Аалай кыһыл лиэнтэни Сунтаар улууһун баһылыга Анатолий Григорьев, хомус Аан дойдутааҕы түмэлин уонна киинин дириэктэрэ Дмитрий Бястинов, Хомус түмэлин салаатын салайаччыта Антонина Никитина, С.А Зверев – Кыыл уолун аатынан УНАК дириэктэрэ Алексей Седалищев быстылар.
Алгыс сиэрин-туомун Николай Омуков ыытта, маанылаах ыалдьыттары сахалыы алаадьынан, кымыһынан күндүлээтилэр.
Түмэл салайааччыта Антонина Никитина ыалдьыттарга кыра экскурсия оҥорон, түмэл туһунан кэпсээтэ.
Ол курдук, түмэлгэ хомус историятын, биллэр хомусчуттар уонна хомус уустарын туһунан стендалар бааллар. Ону сэргэ араас уустар хомустара тураллар.
Бу С.А Зверев- Кыыл Уолун аатынан норуот айымньытын киинигэр аһыллыбыт хомус түмэлин кэлэн көрүҥ, сэргээҥ.
Дмитрий ЫМЫЧАНОВ