Бүгүн Сунтаарга тустуу бырааһынньыга. Ол курдук, биһиги улууспутугар Николай Тарскай кэриэһигэр көҥүл тустуу өрөспүүбүлүкэ чөмпүйэнээтэ биһиги улууспутугар А.И.Иванов аатынан олимпийскай эрллэри бэлэмниир оскуола манеһыгар бүгүн, сарсын ыытылар. Тарскай кэриэһигэр ыытыллар чөмпүйэнээт биһиги биир дойдулаахпыт, РФ уонна ДНР Дьоруойа, Дмитрий Егоров төрөөбүтэ 50 сылыгар ананар. Чөмпүйэнээккэ 18 улуустан 150-ча бөҕөс көбүөргэ тахсыаҕа. Бөҕөстөр ортолоругар өрөспүүбүлүкэҕэ, Арассыыйаҕа, Арассыыйа да таһыгар биллэр-көстөр тустууктар бааллар. Ол курдук, норуоттар икки ардыларынааҕы кылаастаах успуорт 2 маастара, Арассыыйа успуорун 30 маастара, Арассыйа успуорлун маастарыгар 58 хандьыдаат тустууларын көрүөхпүт.
Бу икки күн устата 10 ыйааһыҥҥа тустуу буолуоҕа. Чөмпүйэнээккэ Чурапчы, Мэҥэ Хаҥалас, Уус Алдан толору састааптаах хамаанданан кэллилэр. Ону сэргэ биһиги улууспут толору састааптаах.
Күрэхтэһии кылаабынай судьуйата — Вячеслав Кривошапкин. Оттон бу икки күнү биһиги биир дойдулаахпыт Александр Васильев-Көрдүгэн саҥаран-иҥэрэн, киирсиилэри сытыырхатыа.
Тустууну сэҥээрээччилэр, таптааччылар бүгүн, сарсын манежка кэлэн бөҕөстөр киирсиилэрин көрүҥ. Киирии билиэт сыаната – 100 солк.
Яина Власьева