Сунтаар улууһугар атырдьах ыйын 24 күнүттэн балаҕан ыйын 2-с күнүгэр диэри өрөспүүбүлүкэтээҕи 2-с №-дээх балыыһа суһал медицинскэй көмөтүн кииниттэн хирурдар мобильнай биригээдэлэрэ кэлэн, дьону көрөн эпэрээссийэлэри ыыта сылдьаллар. Нейрохирург быраас Зораб Саакян салайааччылаах биригээдэҕэ 8 араас идэлээх быраастар бааллар. Ол курдук, травматолог-ортопед, отоларинголог, ангиохирург, анестизиолог үс орто медперсонал. Бу күннэргэ быраастар барыта 60 киһини көрдүлэр-иһиттилэр. Ону тэҥэ ЛОР, ортопед, варикоз эпэрээссийэлэрин үс күҥҥэ 19 киһиэхэ оҥордулар. Быраастар уопсайа 40-чэ киһиэхэ эпэрээсийэ оҥорор былааннаахтар.
Бүгүн үрүҥ халааттаах аанньаллар улуус баһылыгын Анатолий Григорьевы кытта көрүстүлэр. Кыһамньылаах, үтүө, амарах санаалаах дьон туһугар үлэлии-хамсыы сылдьар быраастарга баһылык махтал суруктары туттарда.
Санатан эттэххэ, «Өрөспүүбүлүкэтээҕи мобильнай биригээдэлэрин киинэ» бырайыак Ил Дархан Айсен Николаев көҕүлээбитэ. Бу үлэ дойду Бэрэсидьиэнэ Владимир Путин көҕүлээбит «Доруобуйа харыстабыла» национальнай бырайыак сыалын уонна соруктарын толорууга ыытыллар.
Дьокуускай куоракка айаннаабакка, миэстэтигэр көрдөрүнэр табыгастааҕа олохтоох дьоҥҥо абыраллаах диэн эмтэммит дьон санааларын үллэстэллэр.
Оксана В., Сунтаар олохтооҕо:
— Куораттан быраастар кэлэллэрин туһунан биллэриигэ көрөн, 122 нүөмэргэ тутатына эрийэн суруйтарбытым. ЛОР быраас эпэрээссийэҕэ анаабыта ыраатта. Уочарата бэрдиттэн уонна төлөбүрдээх буолан, кыайан барбакка сылдьыбытым. Хата, бу бэйэбитигэр тиийэн кэлбиттэригэр көрдөрүнэн эпэрээссийэм этэҥҥэ ааһан олус астынным. Хирургиябыт балыыһата миэстэ бэлэмнээн олус үчүгэй усулуобуйаҕа сытабыт. Дириҥ билиилээх эдэр быраастар эйэҕэстик, болҕомтолоохтук сыһыаннаһан долгуйбут, ардыгар куттаммыт санаабытын уҕарыталлар. Түгэнинэн туһанан, көрөн-истэн эпэрээссийэни ыыппыт маҥан халааттаах аанньалларга — хирургия бары үлэһиттэригэр улахан махталбын тириэрдэбин.
Дьэ, бу курдук көрдөрүммүт уонна эпэрээссийэлэммит дьон үгүс. Кинилэр быраастар эппиэтинэстээхтик ис сүрэхтэриттэн олус кыһаллан, болҕомтолоохтук дьону көрө сылдьалларыттан үөрүүлэрэ да, махталлара да үгүс. «Национальнай бырайыактар олоххо киирэн дьон туһугар үлэлиирэ олус үчүгэй» диэн этэллэр. «Биһиги дойдубут баһылыгар Владимир Путиҥҥа, өрөспүүбүлүкэбит Ил Дарханыгар Айсен Николаевка, доруобуйа харыстабылын министиэристибэтигэр махталбытын тириэрдэбит» диэн кэпсэппит дьонум санааларын үллэһиннилэр.
Алена ИВАНОВА