Бүгүн Сунтаарбыт улууһугар дойду бэрэсидьиэнэ Владимир Путин көҕүлээбит «Олорор дьиэ уонна куорат эйгэтэ» национальнай барыл иитинэн «Хаарбах дьиэттэн дьону көһөрүү» өрөспүүбүлүкэтээҕи анал бырагырааманан Сунтарскай переулок 1А аадырыска элбэх кыбартыыралаах таас дьиэ иккис уочарата итиэннэ тиэргэннэри тупсаҕай оҥорууга туһуламмыт «Уһук Илиҥҥэ 1000 тиэргэн» барылынан оҕо оонньуур былаһааккатын үөрүүлээх быһыыга-майгыга арыйдылар.
Бэлиэ түгэҥҥэ СӨ Бырабыыталыстыбатын бэрэссэдээтэлин солбуйааччы Георгий Степанов, СӨ үп миниистирин эбээһинэһин толорооччу Иван Алексеев, улуус баһылыга Анатолий Григорьев, Сунтаар нэһилиэгин баһылыгын солбуйааччы Семен Николаев уонна ыраахтан-чугастан ыҥырыылаах ыалдьыттар кыттыыны ыллылар, эҕэрдэ тыл маанытын эттилэр. Бу дьиэ бастакы, иккис подъеһыгар барыта 48 саҥа кыбартыыра күлүүһүн хаһаайыттарга туттардылар. Таас дьиэ тутуутун Владимир Яковлев салайааччылаах «Дабанстрой» ХЭТ тутан үлэҕэ киллэрдэ. «Дабанстрой» тэрилтэ Сунтаар улууһугар олус элбэх тутууну, ол иһигэр социальнай эбийиэги ылсан таһаарыылаахтык үлэлиир.
Дьиэ хаһаайыттара бары ирдэбилгэ эппиэттиир, толору хааччыллыылаах дьиэҕэ киирэллэриттэн олус үөрэллэр.
Елизавета ТИТОВА