Ил Дархан Айсен Николаев стипендиаттара
2023 сылга Саха Өрөспүүбүлүкэтин орто анал үөрэхтэрин кыһаларын бастыҥ устудьуоннарыгар Ил Дархан Айсен Николаев стипендиялара ананнылар. Сунтаардааҕы технологическай колледж бастыҥ устудьуоннара Анна Петрова, Нарыйа Филиппова 2023 сыл түмүгүнэн Ил Дархан Айсен Николаев стипендиаттара буоллулар.
Анна Петрова повар, кондитер, Нарыйа Филиппова ювелир идэлэригэр туйгуннук үөрэннилэр. Кинилэр үгүс өрөспүүбүлүкэтээҕи күрэстэр, олимпиадалар кыайыылаахтара, призердара. Анна демонстрационнай эксээмэнин 100 баалга туттарбыта. Сылын аайы Ил Дархан Айсен Николаев стипендията бастыҥтан бастыҥ устудьуоннарга ананар.
“Төрөөбүт төрүт тыл түһүлгэтэ” бырайыак
Сунтаар улууһугар 2023 сыл төрөөбүт тыл сылынан биллэриллибитэ. Сунтаардааҕы технологическай колледж, Сунтаар улууһун үөрэҕин салалтата, “Матери России” түмсүү Сунтаардааҕы салаата “Төрөөбүт төрүт тыл түһүлгэтэ” диэн ыытар бырайыактарынан Саха Өрөспүүбүлүкэтин күнүгэр — балаҕан ыйын 27 күнүгэр — устудьуоннарга саха тылыгар аналлаах дьыалабыай оонньуу ыытылынна. Төрөөбүт тыл туһунан дьыалабыай оонньууну саха тылын учуутала Татьяна Иванова ыытта. Тэрээһиҥҥэ устудьуоннар көхтөөхтүк кытыннылар. Саамай элбэх сөптөөх толору эппиэти биэрбит кыттааччынан Айсен Павлов, «Электромонтер» бөлөҕүн 1 куурсун устудьуона, буолла.
Аһаҕас аан күннэрэ
Орто анал үөрэхтээһин күнүгэр аналлаах “Билет в будущее” федеральнай бырайыак чэрчитинэн өрөспүүбүлүкэбит бары орто анал үөрэҕин кыһаларыгар профориентационнай үлэҕэ “Аһаҕас аан күннэрэ” ыытылыннылар. Балаҕан ыйын 28 күнүгэр Сунтаардааҕы технологическай колледжка Сунтаар 1 №-дээх орто оскуолатын 7-11-с кылаастарыттан 75 үөрэнээччи оскуола иитэр үлэҕэ дириэктэри солбуйааччыта Лилиана Васильева салалтатынан учууталларынаан кэлэн бардылар.
“Билет в будущее” федеральнай бырайыагынан колледж Сунтаар улууһун үөрэҕин салалтатын кытары хаһыс да сылын үлэлиир. Киирии тылларыгар старшай маастар, үөрэтэр производственнай чааска дириэктэри солбуйааччы э.т. Александра Павлова, методист Дария Тотонова ыччат идэни сөпкө талыытыттан, кини инники олоҕо тутулуктааҕын тоһоҕолоон бэлиэтээтилэр. Преподавателлэр Николай Егоров, Татьяна Васильева, Дария Трофимова, Тимофей Заболоцкай, Александр Егоров, маастардар Анатолий Тарасов, Сергей Антонов оҕолорго идэлэр тустарынан интэриэһинэй экскурсияны тэрийэн ыыттылар. Маннык хабааннаах тэрээһиннэри колледж Сунтаар улууһун оскуолаларын кытары былааннаахтык ыытар соруктаах.
Александра ПАВЛОВА.