Бүгүҥҥү күнтэн, Дьокуускай куоракка биллиилээх учуонай, академик, тиэхиньическэй наука дуоктара В.П. Ларионов аатыгар XXIX-с өрөспүүбүлүкэтээҕи «Инникигэ хардыы – Professor V.P. Larionov «A Step into the Future Science Fair»» научнай-практическай кэмпириэнсийэ куоҥкуруһа саҕаланна.
Манна өрөспүүбүлүкэ араас муннуктарыттан олус элбэх, эдэр чинчийээччилэр тоҕуоруһа муһуннулар. Олор истэригэр Сунтаарбыт улууһуттан Юлия Ананьева салайааччылаах барыта 45 үөрэнээччи кытта тиийдэ. Ол курдук, оҕолор математика, физика, астрономия, химия, география о.д.а. араас хайысхалаах секцияларга бэйэлэрин үлэлэрин киэҥ дьүүлгэ билиһиннэриэхтэрэ.
Бүгүн, тохсунньу 9 күнүгэр, «Триумф» успуорт уораҕайыгар кэмпириэнсийэ үөрүүлээх арыллыыта буолла. Ону тэҥэ, кэмпириэнсийэ маҥнайгы түһүмэҕэ ыытылла турар. «Инникигэ хардыы» куоҥкурус, Дьокуускай куорат үөрэх араас кыһаларыгар үс күн устата ыытыллыа. Улууспут кэскиллээх, эдэр чинчийээччилэригэр ситиһиини баҕарыаҕыҥ.
Елизавета ТИТОВА