Сэтинньи ый 10 күнүгэр Бордоҥ нэһилиэгэр сахалыы остуол оонньуутугар — Хабылыкка «Иитиллээччи уонна иитээччи» улуустааҕы онлайн-күрэх буолан ааста. Бу күрэхпит Арассыыйаҕа Педагог уонна Аҕа сүбэһит, Саха өрөспүүбүлүкэтигэр Үлэ, Сунтаар улууһугар Төрөөбүт төрүт тыл сылларыгар, Сунтаар улууһугар Хабылык күнүгэр ананна. Ол курдук, күрэххэ барыта 11 хамаанда: Кутана, Бордоҥ, Уһун Күөл, Бүлүүчээн, Күндэйэ уонна Сунтаар «Чебурашка», «Ньургуһун», «Березка” уһуйааннарыттан бөлөҕүнэн (бэлэмнэнии, улахан бөлөх) кыттыыны ыллылар. Сүрүн судьуйаларынан Сунтаардааҕы төрүт остуол оонньууларын федерациятын салайааччыта, улууска 4 төгүл «Лучший председатель федерации» номинация хаһаайына, өрөспүүбүлүкэҕэ «Сахаада спорт» ассоциация «Лучшая федерация» номинациятын 2 төгүллээх кыайыылаҕа, Хабылык күнүн төрүттээччи Мария Васильева уонна оҕо саадын иитээччи-көмөлөһөөччүтэ, Манчаары оонньууларын адаптивнай успуорт остуол оонньуутун кыттыылааҕа, элбэх өрөспүүбүлүкэтээҕи турнир чөмпүйүөнэ Людмила Черепанова үлэлээтилэр. Тыҥааһыннаах киирсиилэр кэннэ улахан бөлөххө I миэстэ Бордоҥ «Хатыҥчаан» бастакы хамаандата — иитээччи В.А. Сантаева, иитиллээччи Федотова Ромарина, II миэстэ Сунтаардааҕы «Чебурашка» уһуйаан — иитээччи С.В. Семенова, иитиллээччи Павлова Злата, III миэстэ Бордоҥ «Хатыҥчаан» иккис хамаандата — иитээччи И.А. Матросова, иитиллээччи Гермогенова Настя буоллулар. Бэлэмнэнии бөлөххө I миэстэни Бордоҥ «Хатыҥчаан» уһуйаанын бастакы хамаандата — иитээччи Л.С. Прокопьева, иитиллээччи Молдагулов Саят; II миэстэни Уһун Күөл «Сулусчаан» оҕо саадын хамаандата — иитээччи Р.В. Николаева, иитиллээччи Тихонова Сандаара, III миэстэни Сунтаардааҕы “Чебурашка” уһуйаан — иитээччи А.С. Николаева, иитиллээччи Степанова Алисия ыллылар.
Бары кыттыбыт иитээччилэргэ, оҕолорго инникитин ситиһиини баҕарабыт! Саха остуол оонньуутунан дьарыктаныҥ, таптааҥ, доруобай буолуҥ!
Любовь ПРОКОПЬЕВА, сүрүннүүр иитээччи.