Бэҕэһээ олунньу 21 күнүгэр Улуу Кыайыы былааҕын “Бары бииргэ – Кыайыыга!” девизтээх эстэпиэтэ чэрчитинэн Сунтаар улууһугар үөрүүлээхтик көрсүбүппүт. Бүгүн Сунтаарбыт нэһилиэгин оскуолаларынан, үөрэх тэрилтэлэринэн былааҕы көрсүү буолла.
Сарсыарда эрдэттэн Сунтаардааҕы 3-с нүөмэрдээх оскуолаҕа Кыайыы былааҕын үөрүүлээх көрсүү сиэрэ-туома өрө көтөҕүллүүлээхтик ааста. Тэрээһиҥҥэ Сунтаардааҕы бэтэрээннэр сэбиэттэрин бэрэссэдээтэлэ Афанасий Васильев, улуус үөрэҕириитин управлениетын иитии уонна эбии үөрэхтээһин отделын салайааччыта Александра Павлова, ыччат отделын салайааччыта Трофим Иванов кыттыыны ыллылар. Кинилэр эҕэрдэ тылларын эттилэр, үүнэр көлүөнэ ыччакка дойдуга бэриниилээх буолууга, устуоруйаны өйдүү-саныы сылдьалларыгар үгүс баҕа санааларын эттилэр.
Салгыы «Кыайыы былааҕа» Сунтаардааҕы технологическай коллеһыгар кэллэ. Бу үөрэх кыһатыгар дойдуларын чиэстээхтик көмүскээбит Арассыыйа, ДНР Дьоруойа Дмитрий Егоров уонна Арассыыйа Дьоруойа Филипп Евсеев үөрэммиттэрэ. Ону тэҥэ үгүс выпускниктар чиэстээхтик байыаннай дьайыыга кыттыыны ыла сылдьаллар.
Онтон Кыайыы былааҕын көрсүү тэрээһинэ Сунтаардааҕы политехническай лиссиэйигэр буолла. Үөрэнээччилэр, учууталлар сүргэлэрэ көтөҕүллэн ох курдук оҥостон көрүстүлэр.
Салгыы В.Павлов аатынан алын сүһүөх оскуолатын үөрэнээччилэригэр тиийдэ. Байыаннайдыы таҥныбыт кырачаан саллааттар дьоһуннаахтык хорсун буойуттары холобур оҥостон ырыа ыллаатылар, сэлэлии хаамтылар. Кэлэн иһэр Аҕа дойдуну көмүскээччилэр күннэринэн эҕэрдэлэрин эттилэр.
Бу кэннэ гимназияҕа, 2-с нүөмэрдээх уонна М.Герасимов аатынан санаторнай оскуолаларыгар сырытта.
Үөрэх тэрилтэлэрэ бары үрдүк таһымҥа олус долгуйан көрүстүлэр. Хас биирдии оскуола дойду гииминин доҕуһуолунан Кыайыы былааҕын күөрэччи тутан киирэн иһийии мүнүүтэтин биллэрдэ. Кыайыы хоһоонун үөрэнээччилэр киэн тутта, доргуччу аахтылар, ырыа ыллааттылар.
Санатан ааһар буоллахха, Аҕа дойду улуу сэриитигэр Сунтаарбыт улууһун олохтоохторо кыайыыны уһансыыга улахан кылааттарын киллэрбиттэрэ. Улууспутуттан 2756 киһи саа-саадах тутан сэриигэ ыҥырыллан барбыта. Олортон 1664 киһи ийэ дойдутун көмүскэлигэр олохторун толук уурбуттара. 1096 буойун кыайыы үөрүүтүн билэн дойдуларыгар эргиллибиттэрэ. Ону тэҥэ бу күҥҥэ 80-ча кэриҥэ тыыл бэтэрээнэ, 340 сэрии оҕолоро бааллар. Билигин биһиги улуустан икки сэрии бэтэрээнэ Мартын Григорьев, Петр Яковлев Улуу Кыайыыны көрсүөхтэрэ.
Устуоруйаҕа хаалар долгутуулаах тэрээһин Сунтаар нэһилиэгин үөрэх тэрилтэлэринэн сырыыта түмүктэннэ. Дойдубут эйэлээх олоҕун иһин сэриилэспит күндү бэтэрээннэри, тыылга үлэлээбит ытык кырдьаҕастары, сэрии оҕолорун кинилэр тустарынан өйдүү-саныы сылдьар барыбыт ытык иэһэ.
Алена ИВАНОВА