Сунтаар нэһилиэгэ төрүттэммитэ 260 сылыгар анаммыт «Т.О.К.» квиз оонньуу элбэх кыттааччыны түмтэ. Оонньуу Сунтаар нэһилиэгин дьаһалтатын, Л.А.Попов аатынан Сунтаар киин бибилэтиэкэтин үлэһиттэрин көҕүлээһининэн тэрилиннэ.
Уопсайа 7 хамаанда 5 түһүмэхтэн турар оонньууга холоннулар. Тэрилтэнэн, доҕотторун, аймахтарын кытта хамаанда туруорунан кэлэн киэһэлэрин бэрт сэргэхтик атаардылар.
Оонньууну Сунтаар нэһилиэгин историятын тула бэлэмнээбиттэр. Ол иһин, хамаандалар ох курдук оҥостон кэлбиттэр, бары олус бэлэмнээхтэрэ, көхтөөхтөрө көһүннэ.
Урукку саһарбыт хаартыскаларынан нэһилиэк бэлиэ сирдэрин, биллэр дьонун таайдылар, дьааһык кистэлэҥин арыйдылар.
Оонньуу кэнниттэн бары кэриэтэ олус үөрэн-көтөн, өттүк харалаах тарҕастылар. Ольга Захарова «Ааныска сиэннэрэ» хамаанда кыттаччыта:
«Олус сэргэх, үчүгэй тэрээһиҥҥэ кыттан, кыайыылаах тахсан үөрдүбүт. Сунтаарбыт историятыгар элбэҕи биллибит, саҥаны арыйдыбыт. Бары да түһүмэхтэр интэриэһинэйдэр. Хамаандабыт хапытаана 85 саастаах Ааныска уола Владимир Гаврильевич олус элбэҕи билэр. Боппуростарга, урукку хаартыскаларга элбэх сөптөөх хоруйдары этэн биэрдэ. Балтыларбыт Анна, Зинаида, бииргэ төрөөбүт быраатым Вячеслав үлэлиир эйгэлэринэн, билиилэринэн сөптөөх баллары биэрэн, ол түмүгэр кыайыылаах таҕыстыбыт. Тэрийээччилэргэ, спонсордарга махтанабыт. Кэлэр өттүгэр маннык билиини кэҥэтэр, дьону түмэр тэрээһиннэр өссө буола турдуннар».
Сытыы киирсиилээх оонньуу кэнниттэн түмүк маннык буолла 3 үрдэл «Дьулуур» хамаанда 5000 солк. туттулар, 2 үрдэл «Кэскил» хамаанда 10000 солк., 1 үрдэл кырдьаҕаһы хааһахха укта сылдьан сүбэлэппит «Ааныска сиэннэрэ» кыайыылаах буолан 20000 солк. уу харчынан туттулар.
Маннык көҕү көтөҕөр күрэстэргэ дьон оонньуон баҕарарын көрдөрдө, кэлэр оонньуу хаһан буоларын уонна туох тиэмэтигэр ананарын туоһулаһа хааллылар.
Мира АФАНАСЬЕВА