Сунтаар улууһун баһылыга Анатолий Григорьев салайааччылаах дэлэгээссийэ байыаннай дьайыы кыттыылаахтарын кытта көрсө Курскайга, Ростовскай уобаласка, Запорожьеҕа, Луганскайга тиийэ сылдьаллар. Бу сырыыга гуманитарнай көмөнү – ас-үөл, таҥас-сап, о.д.а., саллааттар сакаастарын — байыаннай оборудованиелары, “Сокол” тиэхиньикэни атыылаһан тириэртилэр. Ону тэҥэ, Ростовскай уобалас госпиталыгар үлэлиир, эмтэниини ааһар уонна бу уокурукка үлэлиир уолаттары көрүстүлэр.
Анатолий Григорьев Новоазовскай оройуон баһылыга Василий Овчаровы кытта көрсөн бииргэ үлэлэһэр былааннары торумнаатылар. Дойдуларыгар бэриниилээх баҕа өттүнэн барбыт «Боотур» этэрээт байыастарын кытта көрүстүлэр. Хас биирдии сылдьыбыт сирдэригэр уолаттары кытта көрсөн, ирэ-хоро кэпсэтэн, этэҥҥэ сылдьалларыгар анаан көмөлөрүн уонна харысхаллары туттартаатылар. Дойдуларыттан көмө тутан, ахтылҕаннаах астарын аһаан астыммыт саллаат үгүс.
Манна санатан ааһар буоллахха, Анатолий Васильевич дьаһалынан Элгээйи нэһилиэгэр эти хатарар оһох ылыллан тигинэччи үлэлиир. Нэһилиэк дьаһалтатын үлэһиттэрэ эт араас көрүҥүн бэлэмнээн таһаараллар. Бу оһох байыаннай дьайыыга сылдьар уолаттарбытыгар дойдубут аһын сибиэһэйдии тириэрдэр сыаллаах ылыллыбыта. Дойдутуттан ыраах сылдьар киһиэхэ бэйэ аһа тиийэрэ туохтааҕар да күндүтүн көмөнү туппут уолаттар этэллэрэ сүргэни көтөҕөр.
Бу туһунан @suntaar_ulus телеграмм канала суруйар.
Алена ИВАНОВА
хаатыскалар @suntaar_ulus телеграм каналыттан