Тохсунньу 18-19 күннэригэр доруобуйаларыгар хааччахтаах спортсменнары түмэр кыһыҥҥы чэпчэки атлетикаҕа өрөспүүбүлүкэ чөмпүйэнээтэ тэриллэр.
Афанасий Жараев адаптивнай успуорт тириэньэринэн үлэлээбитэ ыраатта. Кини алта кɵрүҥҥэ: чэпчэки атлетикаҕа, олорон эрэ волейболга, голболга, шаудауҥҥа, остуол оонньууларыгар, теннискэ — успуорт көрүҥнэригэр барытыгар эрчийэр. Тириэньэр ыччат дьону тɵрɵппүт оҕолорун курдук бүɵбэйдээн, эрчийэн, ситиһиилэрин ааҕан ситиллибэт. Чыпчаал ситиһии олорон эрэ волейболга Алена Дмитриева аан дойду чемпиона буолан Токиоҕа параолимпиадаҕа кыттыыта…
Афанасий Терентьевич иитиллээччилэрэ нус-хас олохтоноллорун туһугар олус кыһаллар. Бэл диэтэр, үлэ, дьиэ кытта булан биэриигэ улахан болҕомтотун уурар. Аҥаардас үс спортсменын «Татыйыына» хампаанньаны кытта кэпсэтэн үлэҕэ киллэрбит, түгэнинэн салайааччыга Нина Герасимоваҕа махталын тириэрдэр.
Кыһыҥҥы чэпчэки атлетика чөмпүйэнээтигэр бэлэмнэнээри ыччаттар үɵрэхтэриттэн, үлэлэриттэн кɵҥүллэтэн кэлэн эрчиллэллэр. Мичийэ Иванова Бүлүүгэ автомеханик идэтигэр үɵрэнэр. Кини илиитигэр күүстээҕин былырыын бэлиэтии кɵрɵн ядро быраҕыытыгар улуус хамаандатыгар киллэрбиттэрэ, ол үтүɵ түмүгэ Аммаҕа үһүстээн үɵрдүбүтэ.
Сунтаарга адаптивнай успуордунан 60-ча киһи дьарыктанар. Ньургустан Макаров Күүкэйтэн киирэн сүүрүүнэн дьарыктанар. Кини кыһыҥҥы спартакиадаҕа 60, 200 миэтэрэҕэ холонуохтаах. «Маннык успуорка угуйуллубуппуттан үɵрэбин» диэн санаатын үллэстэр. Кини сайыҥҥы спартакиадаҕа сүүрбэттэн тахса кыттааччыттан алтыс миэстэ буолбута.
Кытаатыҥ, ситиһиилэри, чыпчааллары, кыайыылары!
Тускулаана ГОРОХОВА-КОБЕЛЬЯНОВА