Бүгүн Арыылаах агрохайысхалаах оскуолатыгар Саха сирин Судаарыстыбаннаһын күнүгэр аналлаах тэрээһиннэр буолан аастылар. Ол курдук, тэрээһин Өрөгөй ырыатынан, үөрүүлээх линейкаттан саҕаланна. Оҕолор өрө көтөҕүллэн туран тапталлаах Сахаларын сирин туһунан хоһооннору аахтылар, ырыалары ыллаатылар. Үөрүүлээх түгэҥҥэ Арассыыйа дьоруойдара, «Алеша тааҥка» экипажтара ойуулаах тэтэрээттэри бэлэх тутан олус үөрдүлэр. «Бастакылар хамсааһыннара» оҕо тэрилтэтиттэн кэлбит паспорт таһын сэттис кылаас үөрэнээччитэ Ванесса Попова тутта. Оскуолабыт бэтэрээн учуутала Ксения Прокопьевна Кларова Судаарыстыбаннас күнүн көрсө Арассыыйа наҕараадатын «За заслугу перед Отечеством» иккис истиэпэннээх уордьаны туппутун туһунан иһитиннэриини үөрэ иһиттилэр, эҕэрдэлээтилэр. Ксения Прокопьевна Арассыыйа уонна Донецкай норуоднай өрөспүүбүлүкэ дьоруойа «Сунтаар» диэн позывнойдаах Дмитрий Егоров кылааһын салайааччыта буолар.
Күн иккис аҥарыгар оҕолор, оскуола үлэһиттэрэ күргүөмүнэн субуотунньукка таҕыстылар. Үрдүкү кылаас уолаттара, эр дьон оскуола аттынааҕы оҕуруот аһын олордор учаастак оҕуруотун бөҕөргөтөр үлэҕэ, онтон атыттар хортуоска кууллааһыныгар, Леонид Попов скверин, оскуола таһын ырааһырдыыга үлэлээтилэр.
Надежда ПЕТРОВА,
дириэктэри иитэр үлэҕэ солбуйааччы.