Бүгүн, алтынньы 11 күнүгэр, Сунтаардааҕы оҕо искусствотын оскуолатыгар Дьокуускайдааҕы Г.М. Кривошапко аатынан СӨ судаарыстыбаннай филармониятын артыыстара ыалдьыттаатылар. Артыыстар искусство оскуолатын үөрэнээччилэрин кытта көрсөн, бэйэлэрин билиһиннэрэн, оркестрга хас даҕаны композицияны оонньоон ытыс тыаһа доҕуһуолланнылар. Искусство оскуолатын дириэктэрэ Алексей Степанов: “Оҕолоор, эһиги бүгүн профессиональнай мусукааннары иһиттигит. Хайдах курдук үчүгэйий”, – диэн бэлиэтээн туран кэлбит артыыстарга махтал суругу уонна оскуола 50 сылыгар тахсыбыт кинигэни бэлэх уунна. Салгыы филармония артыыстара оҕолор ыйытыыларыгар хоруйдаатылар. Ол курдук кырачаан истээччилэр “Инструмеҥҥа оонньуур төһө уустугуй?”, “Маннык оонньуурга төһө өр үөрэниэххэ нааданый”, о.д.а. ыйытыыны биэрдилэр. Бу тэрээһиҥҥэ искусство оскуолатыгар маҥнайгы кылааска киирэр кырачаан үөрэнээччилэри бэлиэтээтилэр Быйылгы үөрэх дьылыгар уопсайа 96 оҕо 1-гы кылааска киирбит. Оҕолор кэрэ эйгэтигэр – искусство оскуолатыгар – киирэр мэктиэ тылларын хоһоонунан эттилэр. Дириэктэри үөрэх чааһыгар солбуйааччы Надежда Яковлева оҕолорго ситиһиилээх үөрэҕи баҕаран тыл эттэ. Салгыы оскуола үөрэнээччилэрэ, уһуйааччылара кыттыылаах олус сэргэх эҕэрдэ кэнсиэр буолла.
Марфа ИВАНОВА.