Былырыын күһүн Сунтаардааҕы технологическай колледж, Сунтаар улууһун дьаһалтата, киин балыыһа Нерюнгритааҕы медицинскэй колледжы кытта түөрт өрүттээх сөбүлэҥҥэ илии баттааннар, Сунтаардааҕы технологическай колледжка биэлсэр отделениета аһыллыбыта.
Саҥа аһыллыбыт отделениеҕа 35 устудьуон (30 кыыс, 5 уол) биэлсэр үөрэҕэр (2 сыл 10 ый устата) үөрэнэ киирбиттэрэ. Кураторынан уопуттаах, үрдүк категориялаах педагог, СӨ үөрэҕириитин туйгуна Вероника Лыткина анаммыта.
– Бэс ыйыгар устудьуоннар биир сыллаах үөрэхтэрин этэҥҥэ түмүктээн 1-кы кууруһу бүтэрдилэр. Үөрэх туйгуннарынан буоллулар: Диана Петрова, Акулина Михайлова, Милена Егорова, Светлана Григорьева, Сарра Озерецковская, Юлия Анисимова.
Устудьуоннар колледжка ыытыллар тэрээһиннэргэ бары көхтөөх кыттыыны ылаллар. Ону таһынан Бүтүн Арассыыйатааҕы, өрөспүүбүлүкэтээҕи орто анал үөрэх кыһаларын устудьуоннарын ортолоругар предметнэй олимпиадаларга ситиһиилээхтик кытыннылар. Үөрэнэ киирбит 35 устудьуонтан иккитэ кэккэ төрүөтүнэн үөрэхтэн тохтообуттара. Инньэ гынан кууруһу 33 буолан бүтэрдилэр. Санатар буоллахха, олортон 15-һэ целевой (тус сыаллаах) дуогабарынан үөрэнэллэр. Үөрэхтэрин бүтэрдэхтэринэ дуогабар быһыытынан Хоро, Элгээйи, Бордоҥ, Хадан, Куокуну, Сиэйэ, Маар Күөл нэһилиэктэригэр үлэлии тахсыахтара. Устудьуоннар производственнай практикаларын Сунтаар улууһун балыыһаларыгар аастылар. Кинилэр биэлсэр идэтигэр үөрэнэн инникитин элбэх билиилээх, сатабыллаах исписэлиистэр буолан тахсалларыгар эрэнэбит, – диэн кэпсиир Вероника Серафимовна.
Диана Петрова, СТК биэлсэр отделениетын устудьуона:
– Сунтаарга былырыын күһүн аһыллыбыт Нерюнгритааҕы медицинскэй колледж филиалыгар биэлсэр идэтигэр үөрэнэбин. Бастакы кууруһу туйгуннук бүтэрдим. Биһиги 33 буолан үөрэнэ сылдьабыт. Сунтаарга маннык үөрэх аһыллыбыта үөрүүлээх түгэн. Медик идэтэ диэн олус эппиэтинэстээх, бэриниилээх үлэ. Үөрэх дьылын устата араас предмети үөрэттибит: анатомия, фармакология, хирургия, терапия, о.д.а. Ону тэҥэ Сунтаардааҕы киин балыыһа отделениеларыгар 2 нэдиэлэ практиканы аастыбыт. Балыыһа үлэтин, идэбитин кытта ыкса билсистибит. Үөрэхпит олус интэриэһинэй, элбэх билиини биэрэр диэн бэлиэтээтим.
Мин бу үөрэх салаата манна Сунтаар колледжыгар аһылларын туһунан биллэриигэ көрбүтүм. Толкуйданан баран туттарсан көрөргө санаммытым. Биэлсэр идэтигэр үөрэтэр отделение Сунтаарга аһыллыбыта олус үчүгэй дии саныыбын: дьиэбиттэн чугас, дьиэ кэргэннээх, кыра оҕолоох киһиэхэ наһаа табыгастаах. Бу үөрэххэ киирэн үөрэнэ сылдьарбыттан астынабын. Идэбин дьоҥҥо туһалаах, наадалаах дии саныыбын.
Милена Егорова, биэлсэр отделениетын устудьуона:
– Ааспыт 2023 сылга, Сунтаарбытыгар биэлсэр үөрэҕэ аһыллыбыта. Онно докумуоммун биэрэ охсон, бүддьүөккэ киирэн, этэҥҥэ 1-кы кууруспун бүтэрдим. Ханнык баҕарар үөрэх чэпчэкитэ суох, ыарахаттар бааллар этэ. Ол да буоллар, 33 үөрэнээччиттэн, 4 туйгун үөрэнээччилээх, 21 хорошистаах түмүктээтибит. Практикабыт олус үчүгэйдик ааста. Балыыһа үлэһиттэрэ барытын көрдөрөн, быһааран, ааспыт лиэксийэлэрбит таһынан эбии элбэх билиини биэрдилэр. Маны таһынан үөрэх устата араас тэрээһиҥҥэ, олимпиадаҕа кыттыбыппыт. Сунтаарбытыгар маннык үөрэх аһыллыбыта олус үчүгэй. 1-кы кууруспутун этэҥҥэ, үчүгэйдик түмүктээбиппитигэр кураторбытыгар Вероника Серафимовнаҕа уонна салайааччыларбытыгар улахан махтал буоллун. Бу 33 устудьуон бииргэ тутуспутунан өйөһөн-өйдөһөн үөрэхпитин этэҥҥэ бүтэриэхпит диэн эрэнэбин.
Марфа ИВАНОВА