РФ Бэрэсидьиэнэ Владимир Путин көҕүлээһининэн ылыллыбыт “Олорор дьиэ уонна куорат эйгэтэ” национальнай бырайыак чэрчитинэн үлэлиир «2019-2025 сс. хаарбах дьиэттэн дьону көһөрүү” бырагырааманан кэнники сылларга үгүс тутуу барда, элбэх дьон саҥа кыбартыыраланар дьолун биллэ.
Сунтаар улууһугар бу бырагырааманан тутуллубут элбэх кыбартыыралаах дьиэлэр 2020 сылтан үлэҕэ киирэ тураллар. 2019-2025 сс. улууска уопсайа 34 тыһ. 524 кв.м иэннээх 199 хаарбах туруктаах дьиэттэн 1130 киһи көһөрүллүөхтээх. Ааспыт сыл түмүгүнэн улууска уопсайа 13 тыһ.535 кв.м. иэннээх элбэх кыбартыыралаах олорор 9 дьиэ тутуллан үлэҕэ киирбит.
Ол курдук, 2020 с.: Туойдаах нэһилиэгэр 4 кыбартыыралаах, Сунтаар нэһилиэгэр Октябрьскай уул, 76/2 35 кыбартыыралаах, Октябрьскай уул., 49-гар – 88 кыбартыыралаах (бастакы уочарата), Илимнииргэ 8 кыбартыыралаах дьиэлэр тутуллан үлэҕэ киирбиттэрэ.
2021 с. Аллыҥаҕа – 8 кыбартыыралаах, Кутанаҕа – 12 кыбартыылаах, Сунтаарга Өктөөп 70 сыла уул. 1В 47 кыбартыыралаах дьиэлэр.
2022 с. Октябрьскай уул., 49-гар – 88 кыбартыыралаах (иккис уочарата), Сунтаарга Өктөөп 70 сыла уул. 1Б 41 кыбартыыралаах дьиэлэр.
Билиҥҥитэ бу дьиэлэргэ 243 кыбартыыраҕа дьон көһөн олорор.
2023 сылга сүрүн үлэлэрэ бүтэн сотору үлэҕэ киирэллэрэ көһүтүллэр тутуулар: Сунтаарга Сунтарскай переулок 1 А 5 этээстээх дьиэ 3-с подъеһа, Хадаҥҥа икки 4-түү кыбартыыралаах, Күүкэйгэ уонна Куокунуга 4 кыбартыыралаах, Устьеҕа 30 кыбартыыралаах дьиэлэр.
Хаарбах дьиэлэргэ олорооччулар кыбартыыра оннугар харчынан компенсацияны ылыахтарын сөп. Маннык көрүҥүнэн 500 кв м иэннээх 12 кыбартыыра олохтооҕо туһаммыт.
Инникитин бу бырагырааманан тутуу үлэтэ эбии барара былааннанар.
“Сунтаар сонуннара” хаһыат.