Быйыл сайын Үүнэр көлүөнэ тус сыаллаах пуондата тэриллибитэ 30 сылыгар анаммыт «Кэлэр кэми бииргэ уһансабыт» диэн өрөспүүбүлүкэтээҕи форум ыытыллыбыта. Манна «Инносфера-2023» диэн оҕо инновационнай кииннэрин өйүүр сыаллаах ыытыллыбыт грант куонкуруһун түмүгүнэн П.Х. Староватов аатынан Элгээйи орто оскуолатын бырайыага кыайыылааҕынан буолбута.
Бүгүн Элгээйи орто оскуолатыгар бу граҥҥа кыайбыт бырайыагынан «Смарт Гекс — аныгы компетенция 6 кырыыта» диэн оҕо дьоҕурун сайыннарар киин үөрүүлээх быһыыга-майгыга аһылынна. Бу үөрэтэр кииҥҥэ оҕолор саахымат, дуобат, конструирование, графическай дизайн, робототехника, киберспорт хайысхаларынан дьарыктаныахтара, араас хабааннаах тэрээһиннэргэ кыттыахтара.
Киин аныгы ирдэбилгэ эппиэттиир тиэхиньикэнэн мебелинэн хааччылынна. Ону тэҥэ федеральнай ирдэбилгэ сөп түбэһэр тупсаҕай өрөмүөн ыытылынна.
Киини тэрийээччилэр оҕолору уонна төрөппүттэри инновация эйгэтигэр хардыылары оҥорор дьарыктарга ыҥыраллар.
Марфа ИВАНОВА.