Үөрэҕирии биир сүрүн соругунан, дьоҕурдаах уонна ситиһиилээх ыччаты иитэн таһаарыыбыт буолар.
Учуутал идэтэ уустук, элбэх үлэни, дьулууру, эппиэтинэстээх буолууну, саҥаттан саҥа билиини ирдиир идэ. Учуутал методическай таһыма төһөнөн үрдүк, билиитэ-көрүүтэ киэҥ буоллаҕына, үөрэнээччилэрбит бигэ билиини ылаллар, БК, ОГ эксээмэннэри туттараллар, үөрэххэ киирэллэр.
Үөрэнээччилэргэ, үөрэх үлэһиттэригэр туһаайыллыбыт, Сочига баар, «Сириус» үөрэҕирии киинин үлэтэ олус интэриэһинэйин уонна туһалааҕын билэбит.
Биһиги өрөспүүбүлүкэбитигэр баар С.Н.Донской-II аатын сүгэр Үөрэх үлэһиттэрин таһымын үрдэтэр институт физика, математика үөрэхтээһинин кафедратын сэбиэдиссэйэ М.И.Баишева көҕүлээһининэн, элбэх учуутал, бэйэлэрин билиилэрин тургуппуттара.
Үгүс кыттааччылаах сүүмэрдээһини ааһан, тохсунньу 17-22 күннэригэр Бүлүү гимназиятын учуутала Юлия Дмитриевалыын, Саха сириттэн икки буолан, бу кииҥҥэ ыҥырыы тутан, олус үчүгэй тэрээһиннээх, туһалаах “Особенности внешкольной работы с детьми в области математики” диэн кууруска үөрэнэн кэллибит. Арассыыйа араас элбэх оскуолаларыттан, барыта отут биэс учуутал кэлбит. Бэйэлэрин идэлэрин баһылаабыт киэҥ билиилээх, дириҥ толкуйдаах дьоҥҥо үөрэннибит. Кинилэр ортолоругар бүтүн Арассыыйатааҕы математика олимпиадатын дьүүллүүр сүбэтигэр киирэн үлэлиир учууталлар, физика, математика билимин кандидаттара Н.Х.Агаханов, Н.Н.Андреев, С.Г.Волчёнков, 2015 сыллааҕы Аан дойдутааҕы математика олимпиадатын призера, Санкт-Петербург 239 №-дээх физиканы, математиканы үөрэтиигэ Президент лицейин эбии үөрэхтээһинин учуутала А.С.Кузнецов о.д.а бааллар.
Кылгастык билиһиннэрдэххэ, үөрэнээччилэри математика олимпиадатыгар бэлэмнээһин сатабыллара уонна ньымалара, олимпиада сорудахтарыгар киирбит уустук садааччалары суоттаһын методическай ньымата, орто сүһүөх кылаас оҕолорун олимпиадаҕа бэлэмнээһин бастакы хардыылара, ахсаан уруогар аналлаах эбии дьарыктарга, куруһуокка аналлаах сорудахтары оҥоруу сүрүн ирдэбиллэрэ диэн дириҥ ис хоһоонноох, киэҥ суолталаах тиэмэлэри үөрэттибит, ырыттыбыт. Үөрэхпит түмүгүнэн, Арассыыйа Бэдэрээссийэтин “Дьоҕур уонна ситиһии” үөрэтэр Фондун, идэ таһымын үрдэтиини туоһулуур анал докумуонун туттубут.
Куурус аҥардас ахсаан уруогар эрэ буолбакка, үөрэхтээһин хайысхатын сүрүн оҥкулларыгар туһаайыллан, учуутал методическай таһымын үрдэтэр соруктаах тэриллэн ааста. Биһиги сахабыт норуота “Үөрэх баар-бараммат баай” диэн муударай этиитэ олус бэргэн! Маннык элбэх билиини, дьаныары, дьулууру түмпүт, ыраах сиргэ баран үөрэнэн кэлэрбэр өйөбүл буолбут П.Х.Староватов аатынан Элгээйи орто оскуолатын саламтатыгар махталбын тириэрдэбин.
Анисия СТЕПАНОВА,
ахсаан уруогун үрдүк категориялаах учуутала