Кэмпэндээйи нэһилиэгэр «Сир уустара» лааҕыр баарын туһунан киһи эрэ барыта истэн билэрэ буолуо. Бу лааҕыр, маҥнай 1921 сыллаахтан Г.Е. Чолбодуков аатынан санаторий быһыытынан, Саха сиригэр биир бастакынан эмтээх бадараанынан үлэлээн саҕалаабыта. Оттон, 2020 сыллаахха санаторий баазатыгар Өрөспүүбүлүкэтээҕи үөрэтэр-чэбдигирдэр киин «Сир уустара» арыллыбыта. Бу, «Юные якутяне» өрөспүүбүлүкэтээҕи ресурснай киин иһинэн, дьоҕурдаах уонна талааннаах оҕолору өйүүр инниттэн тэриллибитэ. «Сир уустара» лааҕыр салайааччытынан Алексей Филиппов, сэбиэдиссэйинэн Артур Сымытов үлэлии олороллор.
Күн бэҕэһээ, биһиги эрэдээксийэбит үлэһиттэрэ Кэмпэндээйи нэһилиэгэр баран үлэ-хамнас туһунан билсэн кэллилэр. Ол курдук, «Сир уустара» лааҕырга араас нэһилиэктэртэн үөрэнээччилэр кэлэн доруобуйаларын чэбдигирдэ уонна үөрэх араас хайысхаларыгар билии сомсо сылдьаллар. Лааҕыр 3 куорпуһунан (үөрэтэр, эмтиир, утуйар) үлэлии турар. Манна, биир бастакынан эмтиир куорпуска сылдьан сарсыардааҥы процедуралары билистибит. Ол курдук, оҕолор анал графигынан 5 мүн. туус хоһугар киирэн тыынар уорганнарын сайыннараллар, сеанс бириэмэтигэр уоскутар муусука холбоон сынньаналлар эбит. Салгыы массаж хоһугар медицинскэй сиэстирэ Валентина Семенова сымнаҕас илиитин иминэн оҕолор сүнньүлэрин, көхсүлэрин, эттэрин-сииннэрин илбийэн биэрэр. Бу санаторийга Валентина Васильевна 30-тан тахса сыл эҥкилэ суох, олус бэриниилээхтик үлэлии сылдьар. Маны тэҥэ, кислороднай коктейль, фиточай иһэрдэллэр эбит. Салгыы, үөрэтэр куорпуска тахсан араас дьарыктарга сылдьан элбэҕи билэллэр-көрөллөр. Оттон, утуйар куорпуска сылаа таһааран, утуйан сынньаналлар эбэтэр дьиэтээҕи сорудаҕы толорон уруок ааҕаллар. Күҥҥэ 5-тэ иҥэмтиэлээх, сылаас аһынан толору аһыыллар.
Лааҕыр өрөспүүбүлүкэ араас муннуктарыттан сылга ортотунан 400 оҕону хабан үлэлиир. Кыһыҥҥы бириэмэҕэ биир симиэнэҕэ 40 оҕо 14 күҥҥэ, сайын 21 күҥҥэ кэлэн сынньанан, дуоһуйан барар. «Школа вожатых» бырайыак иитинэн улахан кылаас үөрэнээччилэрэ баһаатайдары кытары тэбис тэҥҥэ сылдьыһан оҕолору көрөллөр-истэллэр, дьарыктыыллар. Маны таһынан, улахан дьон эмиэ доруобуйатын тупсарына, сынньана кэлиэхтэрин сөп эбит.
Бу курдук, «Сир уустара» лааҕыр сылы эргиччи оҕолорго уонна улахан дьоҥҥо анаан олус үчүгэйдик үлэлии турар.
Елизавета ТИТОВА