Бу күҥҥэ анаан Сунтаардааҕы технологическай колледжка «Сунтарцеолит» тэрилтэтин үөрүүлээх тэрээһинэ буолан ааста. Онно тэрилтэ үлэһиттэрэ, колледж выпускниктара муһуннулар.
Бастакынан эҕэрдэ тылы тэрилтэ салайааччыта Петр Попов эттэ. Кини тэрилтэ чоҕу хостоон саҕалаабыта быйыл 30 сыла буолбутун бэлиэтээн эттэ.
Петр Михайлович тэрилтэ бастыҥ үлэһиттэригэр СӨ транспорын уонна суолун хаһаайыстыбатын Бочуотунай грамотатын уонна Махтал суругун туттарда. Иккиһинэн тылы тэрилтэни тэрийбит уонна атаҕар туруорбут Михаил Акимов ылла. Кини Кэмпэндээйи таас чоҕун биһиги оройуоммутугар өссө 1958 сылтан бырамыысыланнай көрүҥүнэн хостуурга холоно сылдьыбыттарын туһунан эттэ. Онно сөп буолар кыахтаах тиэхиньикэ кэмчи буолан, кыайтарбатах эбит. Арай, 1992 сылтан үһүстээн холонууга «АЛРОСА» АХ кытта сөбүлэҥ түһэрсэн үлэ саҕаламмыт. Кини шахтнай методынан чоҕу хостоон саҕалаабыппыт диэн эттэ.
Улуус баһылыгын бастакы солбуйааччы Николай Александров эҕэрдэ тылыгар тэрилтэ улууспут экономиката сайдарыгар сүҥкэн кылааты киллэрэрин туһунан эттэ. Түмүгэр бастыҥ үлэһиттэргэ улуус, Кэмпэндээйи, Устье нэһилиэктэрин Бочуотунай грамотатын, Махтал суруктарын туттарда.
Ол курдук тэрилтэ үлэһиттэрин Сунтаар нэһилиэгин баһылыга Эдуард Филиппов, «Кириэстээх» ТХПК дириэктэрэ Владимир Егоров, улуустааҕы баһаарынай сулууспа салайааччыта Сергей Петров, ОДьКХ Сунтаардааҕы филиалын кылаабынай инженерэ Степан Егоров эҕэрдэлээтилэр.
Тэрээһин салютунан түмүктэннэ.
Гаврил АНДРЕЕВ.