Бэҕэһээ А.П. Павлов аатынан Сунтаар 1 нүөмэрдээх оскуолатыгар улуустааҕы эбии үөрэхтээһин педагогтарын идэтийбит маастырыстыбаларын куоҥкуруһа буолан ааста. Куонкурус сыала-соруга – оҕо айымньылаах сайдыытыгар педагог оруолун үрдэтии, эбии үөрэхтээһин педагогтарын статуһун бөҕөргөтүү, кинилэр маастырыстыбаларын тупсарыы, бастыҥ практиканы тарҕатыы уонна улуус талааннаах учууталларын өйөөһүн буолар. Куонкурус тэрийээччилэрэ үөрэх салалтата уонна Н.М. Родионова аатынан оҕо дьоҕурун сайыннарар киин. Быйыл манна эти-хааны чэбдигирдэр, ырыа-тойук, айар куттаах 6 педагог бэйэлэрин тургутан көрдүлэр.
Тэрээһин үөрүүлээх аһыллыытыгар үөрэх салалтатын салайааччытын бастакы солбуйааччы Елена Васильева үүнэр көлүөнэ сайдыытыгар эбии үөрэхтээһин суолтатын бэлиэтээн туран, кыттааччыларга ситиһиилэри баҕарда. Ол кэннэ тута куонкурус бастакы түһүмэҕэ — бэйэни билиһиннэрии ыытылынна.
Иккис түһүмэххэ хас биирдии педагог оҕону үөрэтиигэ уонна иитиигэ ураты ньыматын билиһиннэрдэ, сатаан интэриэһиргэтэр, көҕүлүүр дьоҕурун көрдөрдө. Аһаҕас дьарык таһынан, кыттааччылар “Открытый микрофон” түһүмэххэ аныгы үөрэх боппуруостарыгар дьүүллэһиигэ санааларын, билиилэрин-көрүүлэрин үллэһиннилэр. Кэпсэтиини иилээн-саҕалаан ыытта А.П. Павлов аатынан Сунтаар 1 нүөмэрдээх оскуола дириэктэри иитэр үлэҕэ солбуйааччы Дмитрий Михайлов. Педагогтар араас ыйытыыларга хоруйдаатылар, уопуттарын уонна эбии үөрэхтээһин кэскилин көрүүлэринэн үллэһиннилэр.
Жюри састаабыгар уопуттаах педагогтар, методистар уонна үөрэх салалтатын бэрэстэбиитэллэрэ киирдилэр. Кинилэр кыттааччылар маастырыстабаларын эрэ буолбакка, оҕолору кытта бодуруһуу дьоҕурун, ону тэҥэ улуус эбии үөрэхтээһин тиһигин сайыннарыыга кылааттарын сыаналаатылар.
Түмүгэр эҕэрдэ тылларын эттилэр уонна грамоталары туттардылар Елена Васильева, улуустааҕы үөрэҕирии салалтатын начальнигын бастакы солбуйааччыта, Нина Павлова, улуустааҕы үөрэҕирии тэрилтэлэрин профсоюзтарын бэрэссэдээтэлэ, Александра Павлова, үөрэҕирии салалтатын иитиигэ уонна эбии үөрэхтээһиҥҥэ отделын сэбиэдиссэйэ.
Куонкурус түмүгэ: 3 миэстэлээх грамотанан наҕараадаланна Алла Егорова, Б.Н. Андреев аатынан «ЭРМЭЦ” эбии үөрэхтээһин киинэ, 2 миэстэлээх грамотанан – Анна Попова, Сунтаардааҕы политехническай лиссиэй.
Кыайыылаах аатын сүктэ Н.М. Родионова аатынан оҕо дьоҕурун сайыннарар киин педагога Егор Мурзабаев.
Маны таһынан анал ааттар иҥэрилиннилэр: «Креативный педагог» — Туяра Данилова, «СИТИС» эбии үөрэхтээһин киинэ, «Лучший дебют” – Сахаяна Кузьмина, А.И. Иванов-Кюндэ аатынан Кутана орто оскуолата, “Лучший педагог по физкультурно-спортивной направленности ” – Асланбек Михалев, А.П. Павлов аатынан Сунтаар 1 нүөмэрдээх оскуолата.
Анна Попова уонна Егор Бекназаров муус устар ыйыгар Өрөспүүбүлүкэтээҕи күрэххэ кытта барар чиэскэ тигистилэр. «Сердце отдаю детям – 2025» кыттыылаахтарын барыларын эҕэрдэлиибит, үтүө үлэлэригэр айымньылаах ситиһиилэри баҕарабыт! Кинилэр талааннарынан, үлэҕэ бэриниилэринэн, оҕолорбут инникилэрэ сырдык уонна кэскиллээх буолара саарбаҕа суох.
Үөрэҕирии управлениетын пресс-сулууспата