Саха Өрөспүүбүлүкэтин былааһын ситэриилээх уорганнарын 2023 сыллаах үлэтин туһунан отчуоттара өрөспүүбүлүкэ бары улуустарыгар олунньу 5 күнүттэн олоҕурбут көрүҥүнэн ыытыллар. Биһиги улууспутугар бары нэһилиэктэри хабан туран, СӨ Бырабыыталыстыбатын отчуота олунньу 13 күнүттэн 16 күнүгэр диэри буолуоҕа.
Өрөспүүбүлүкэ ааспыт сыллааҕы үлэтин-хамнаһын туһунан отчуоту биһиги улууспутугар СӨ Бырабыыталыстыбатын Бэрэссэдээтэлин солбуйааччы Георгий Степанов салайааччылаах 9 киһилээх дэлэгээссийэ кэлэн 4 күн үс бөлөҕүнэн арахсан үлэлиэҕэ. Ол курдук, Георгий Михайлович салайар бастакы бөлөҕөр “СӨ массыына суолун управлениетын” отделын начаалынньыга Александр Шипошин, СӨ үөрэҕин уонна билимин министиэристибэтин отделын салайааччыта Степан Степанов бааллар. Бу бөлөх олунньу 13 күнүгэр Устье, Хоро, Элгээйи, 14 күнүгэр Күүкэй, Толоон, Кутана, 15-скэ Күндэйэ, Кэмпэндээйи нэһилиэктэригэр сылдьан отчуоту туруоруохтара.
Оттон СӨ доруобуйа харыстабылын миниистирин бастакы солбуйааччы Дмитрий Сергин, СӨ экономикатын министиэристибэтин госкапвложениеларын уонна федеральнай бырагыраамалары кытта үлэ департаменын салайааччыта Егор Макаров, СӨ олох-дьаһах коммунальнай хаһаайыстыбатын уонна энергетикатын министиэристибэтин олох-дьаһах коммунальнай хаһаайыстыбатыгар уонна энергетикаҕа Департаменын салайааччыта Айсен Кирсанов састааптаах бөлөх олунньу 13 күнүгэр Аллыҥа, Тойбохой, Кириэстээх нэһилиэктэригэр сылдьыахтара. Сарсыныгар Тэҥкэ, Бордоҥ, Илимниир олохтоохторугар отчуоту туруоруохтара. Оттон олунньу 15 күнүгэр бу бөлөх Түбэй-Дьаархан, Түбэй, Сиэйэ нэһилиэктэригэр үлэлиэҕэ.
СӨ үбүн миниистирин бастакы солбуйааччы Иван Алексеев бөлөҕөр СӨ үлэҕэ уонна социальнай сайдыыга миниистирин солбуйааччы Иннокентий Коротких, СӨ тыа хаһаайыстыбатын министиэристибэтин астыыр-таҥастыыр бырамыысыланнаска салаатын салайааччыта Егор Чичигинаров бааллар. Кинилэр олунньу 13 күнүгэр Туойдаах, Хадан, 14-скэ Дьаархан, Маар Күөл, Уһун Күөл, 15-скэ Бүлүүчээн, Наахара, Куокуну нэһилиэктэрин олохтоохторун кытары көрсүһүөхтэрэ.
Оттон олунньу 16 күнүгэр улуус дьаһалтатыгар сарсыарда 9 чаастан биирдиилээн прием оҥоруохтара, дьон санаатын истиэхтэрэ, кинилэрдиин атах тэпсэн олорон кэпсэтиэхтэрэ. Ол кэннэ күнүс 2 чаастан С.А.Зверев-Кыыл Уолун аатынан улуустааҕы норуот айымньытын киинигэр СӨ Бырабыыталыстыбата ааспыт сылга үлэтин отчуотун туруоруоҕа.
Санааларгытын этэ, дьүүллэһэ, этиилэргитин этинэ улууспут олохтоохторо отчуокка көхтөөхтүк кыттыҥ.
Саха Өрөспүүбүлүкэтин судаарыстыбаннай былааһын толорор уорганнарын 2023 сыллааҕы үлэлэрин отчуотун https://сунтаарсонуннара.рф/saha-erespyybylyketin-sudaarystybannaj-bylaahyn-toloror-uorgannaryn-2023-syllaa5y-ylelerin-kylgas-otchuota/ сигэнэн киирэн аах.
Яина ВЛАСЬЕВА