Сунтаар нэһилиэгин 2-с №-дээх «Сардаана» уҺуйаан 60 сааһын, ахсынньы 2-с күнүгэр элбэх ыалдьыттаах, истиҥ-иһирэх дьоро киэһэни тэрийэн бэлиэтээтэ. Бу уҺуйаан Сунтаар улууһугар туспа суоллаах иистээх, о5ону кыра сааһыттан доруобуйаларын бөҕөргөтүүгэ, чөл туруктаах буоларга иитэллэр.
Уһуйаан кэрчик кэмнэрин санаан аастахха, Сунтаар сэлиэнньэтигэр 1963 сыллаахха дьааһыла хонуктаан үлэлиир 2 – с нүөмэрдээх санаторнай дьааһыла буолбута, сэбиэдиссэйинэн Матрена Назарова улэтин са5алаабыта. 1990 сыл алтынньы ый 12 күнүгэр Сунтаар сэлиэнньэтигэр 75 миэстэлээх, 33 үлэһиттээх суукканы эргиччи үлэлиир «Сардаана» диэн санаторнай, тупса5ай оҥоһуулаах, утуйар хостордоох, музыкальнай зааллаах типовой дьааһыла– сад аһыллан үлэҕэ киирбитэ. Сэбиэдиссэйинэн Саха Өрөспүүбүлүкэтин үөрэҕириитин туйгуна Розалия Васильева ананан 2002 сылга дылы таһаарыылаахтык үлэлээбитэ. 2002 сыл сэбиэдиссэйинэн Лариса Иванова ананан үлэлээбитэ. Оҕо саадын кэҥэтиигэ сүрүн кылаатын киллэрбит, ол курдук 2010 сыллаахха Лариса Семеновна, сүүрэн – көтөн туруорсан иккис корпус тутуллубута. Онно шефтарбыт «Сунтаар Цеолит» тэрилтэ, салайааччы Евгений Иванов үлэһиттэр, төрөппүттэр, о5олор интэриэстэрин чугастык ылынан, саҥа куорпус тутуута олоххо киирбитэ.
2010 сылтан эдэр эрчимнээх салайааччы Марина Жиркова үлэтин саҕалаан күн бүгүнүгэр дылы ситиһиилээхтик үлэлии олорор. Уһуйаан аныгы кэмҥэ үлэтин оҕо доруобуйатын тупсарарга усулуобуйа тэринэн 2015 сылга улууска со5отох доруобуйаларынан хааччахтаах оҕолорго аналлаах кылгас бириэмэҕэ сылдьар «Лекотека» группата үлэлиир. Өрөспүүбүлүкэ иһинэн 2020 сылтан «Эрдэтээҥҥи өйөбүл сулууспата» төрүөҕүттэн биэс сааһыгар дылы оҕолорго методическай көмө оҥоһуллар. Уһуйаан үлэтин баай опытын Өрөспүүбүлүкэ иһигэр тарҕатан 2015 сыллаахха «Лучший сельский детский сад» Өрөспүүбүлүкэтээҕи күрэххэ «Признание общественности» уонна «Лучшая оздоровительная программа» номинациялар кыайыылаахтара буолбуттара. 2021 сыл Өрөспүүбүлүкэтээҕи кэтэхтэн көрүү-күрэххэ «Лучший сельский детский сад» кыайыылаах аатын ылбыттара.
Дьоро күҥҥэ уҺуйаан үлэһиттэригэр өр сылларга үтүө суобастаахтык үлэлээбит күндү дьонноругар үрдүк наҕараадалар туттарылыннылар. Кэлбит бэтэрээннэр махтал суруктары уонна өйдөбүнньүк бэлэхтэри тутан үөрдүлэр-көттүлэр. Өр сылларга үлэлээбит бэтэрээннэр ыраахтан-чугастан мустан, ирэ-хоро кэпсэтэн, дуоһуйа сынньанан тарҕастылар.
Валентина СОФРОНОВА
сэбиэдиссэйи иитэр-үөрэтэр үлэҕэ солбуйааччы