Сунтаар нэһилиэгэр доруобуйаларынан хааччахтаах оскуола иннинээҕи саастаах оҕолору сайыннарыыга үлэлиир улууспутугар соҕотох «Сардаана» оҕо сайдар киинэ буолар. Уһуйааны 2010 с. Марина Жиркова салайан күн бүгүнүгэр диэри ситиһиилээхтик үлэлэтэ олорор. Уһуйаан оҕо доруобуйатын тупсарарга сыаллаах сөптөөх усулуобуйа тэрийэн 2015 с. доруобуйаларынан хааччахтаах оҕолорго аналлаах кылгас бириэмэҕэ сылдьар «Лекотека» группатын үлэлэтэр. Өрөспүүбүлүкэбитигэр 2020 с. тэриллэн «Эрдэтээҥи өйөбүл сулууспата» төрүөҕүттэн биэс сааһыгар диэри оҕолорго методическай көмө оҥоһуллар.
«Сардаана» уһуйаан 81 иитиллээччилээх. Оҕолору бары эйгэнэн сайыннарарга араас үлэни ыытар. Лекотека бөлөҕөр логопед, психолог, дефектолог анал хосторо үлэлииллэр. Манна улуус дьаһалтата үп көмө оҥорон улахан төһүү күүс буолбута. Билигин 21 доруобуйаларынан хааччахтаах оҕо баар. Уһуйаан биир уратытынан оҕо доруобуйатын бөҕөргөтөр сыаллаах медицинскэй хостоох. Медсестра Дайана Попова оҕолор доруобуйаларын күннэтэ көрөр-истэр. Маны сэргэ, үҺүс сылын комбинированнай группа үлэлиир. Манна доруобуйаларынан хааччахтаах оҕолор саастыылаахтарын кытта тэҥҥэ сылдьан сайдан, иитиллэн тахсан оскуолаҕа барарга бэлэмнэнэллэр.
Сылын аайы уһуйаан творческай күрэстэри кинилэргэ тэрийэн ыытар. Быйылгы күрэс «Мы вместе» Арассыыйаҕа Дьиэ кэргэн, Саха сиригэр Оҕо саас сылларыгар ананна. Доруобуйаларыгар хааччахтаах дьон дэкээдэлэрин чэрчитинэн видеонан улуустааҕы күрэс хас да номинацияларынан ыытылла турар. Ол курдук, «Мин дьиэ кэргэним» иитээччи, оҕо мнемотаблица көмөтүнэн кэпсээһинэ. Видео-күрэс «Саҥа дьыллааҕы түннүк» төрөппүт оҕотунаан кыттар. «Пряничная фантазия» саҥа дьыллааҕы тиэмэнэн ас астааһын күрэһэ. Оҕолор, иитээччилэр, төрөппүттэр маннык күрэскэ кыттан үүнэн-сайдан, саҥа суолу тобулаллар.
Анна СПИРИДОНОВА, “Сардаана” оҕо сайдар киинин дефектолога