Олохпут биир сыла эмиэ элэстэнэн ааһан эрэр. Дойдубутугар — Арассыыйаҕа, Сахабыт сиригэр, улууспутугар биллэриллибит анал соруктар дьоһуннаахтык толорулуннулар диэн хорсуннук этэр кыахтаахпыт.
Аны бу кэлэр 2025 сылы өрөспүүбүлүкэбит Ил Дархана Айсен Николаев Аҕа дойдуну көмүскээччи сылынан биллэрбитэ бар дьонунан биһирэннэ. Дойдубут көҥүлүн туһугар уоттаах сэриигэ сылдьар дьоммутун биһиги араҥаччылаабатахпытына ким араҥаччылыай… Кинилэр дьиэ кэргэттэригэр миэстэтигэр тустаах көмө тиһигин быспакка оҥоһуллар.
Анал байыаннай дьайыы саҕаланыаҕыттан улуус дэлэгээссийэтинэн уолаттарбытын көрсө, кинилэргэ тустаах тэрил, көмө илдьэ аҕыйаҕа суохтук бара сырыттыбыт. Уолаттарбытын баран миэстэтигэр сирэй көрсөн кэпсэтии-ипсэтии, араас өрүттээх көмөнү оҥоруу туһаттан атыны аҕалбат. Уолаттарбыт сэрии толоонугар хорсуннук сэриилэһэллэр. Кинилэр биир дойдулаахтара Филипп Евсеев, Дмитрий Егоров дьоруойдуу хорсун быһыыларынан киэн тутталлар. Уруй, Айхал биһиги хорсун хотойдорбутугар.
Үүнэр саҥа сылга кыайыы биһиги диэки буолуоҕар биһиги бигэтик эрэнэбит.
Олох устар, олох салҕанар. Ол курдук, биһиги Сунтаарбыт улууһа иннин диэки эрэллээхтик хардыылыыр. Дойду үрдүнэн үлэлиир национальнай бырайыактарынан, федеральнай, өрөспүүбүлүкэтээҕи бырагыраамаларынан улууска араас тутуулар тиһигин быспакка ыытыллан кэллилэр. Олортон бөдөҥнөрүн эрэ ааттаталыы түстэххэ, бу бэрт соторунан чугаһынан тыа сиригэр суох баараҕай бассейн, эһиил баччаларга лиссиэй улахан уораҕайа, сотору хаарбах дьиэлэртэн көһөрүү бырагырааматынан икки биэстии этээстээх дьиэ толору ситэриллиэхтэрэ. Хадаҥҥа бэртээхэй спорткомплекс, Маар Күөлгэ, Сунтаарга «Абаҕа» түөлбэтигэр спортзал, Элгээйигэ балыыһа комплекса, Күүкэйгэ олорор дьиэ о.д.а. тутуулар ааннарын тэлэччи астылар.
Ааһан эрэр сыл биһиги улууспутугар кырдьаҕастарга ураты болҕомто ууруллан ааста. Ол курдук 2024 сыл Сунтаар улууһугар Аҕам саастаахтар олохторун чэпчэтэр туһугар араас өрүттээх үлэлэр ыытыллан кэллилэр.
Олоҥхо дойдута Сунтаар сирэ уруккуттан даҕаны үчүгэй суоллааҕынан биллэр. Билигин ол өссө тупсарыллар.
Күндү доҕоттор, иннибитигэр сыал-сорук үгүс. Онтон сорохторун ааттаталыы түстэххэ, Улуу Кыайыы 80 сылын үрдүк таһымҥа бэлиэтиэхпит, С.А. Зверев-Кыыл Уола төрөөбүтэ 125 сылыгар аналлаах өрөспүүбүлүкэ таһымнаах улахан ыһыах буолуоҕа, Аҕа дойду Улуу сэриитин бэтэрээннэрэ, Петр Константинович Яковлев уонна Григорьев Мартын Герасимович 100 саастарын туолуохтара.
Олунньу ыйга көҥүл тустууга Н.Н. Тарскай аатынан өрөспүүбүлүкэ чөмпүйэнээтин көбүөрэ биһиги улууска тэлгэниэҕэ.
Үтүө үгэс быһыытынан улууспутугар араас сыллары биллэрэбит, ол чэрчитинэн кэлэр сыл үлэтин бырагыраамалара, былааннара оҥоһуллаллар. Ол курдук, кэлэр 2025 сыл Сунтаар улууһугар С.А. Зверев-Кыыл Уолун сылынан биллэрилиннэ.
Ытыктабыллаах биир дойдулаахтарбыт, үүнэр үтүө сыл биһиэхэ барыбытыгар үөрүүнү-көтүүнү эрэ аҕаллын.
Саҥа сылга бука бары өссө түмсүүлээх буолуоҕуҥ. Саҥа дьылынан, саҥа дьолунан күндү доҕоттор!
Анатолий ГИГОРЬЕВ, Сунтаар улууһун Аҕа баһылыга,
Ульяна ПОПОВА, оройуон сэбиэтин дьокутааттарын бэрэссэдээтэлэ