Олунньу 10 күнүгэр Күүкэй орто оскуолатыгар “Саҥа көлүөнэ бастыҥ үөрэнээччитэ-2024” куоҥкурус буолан ааста. Бу куоҥкурус сылын аайы үгэс быһыытынан чаҕылхай талааннаах, билиилээх-көрүүлээх, бэйэни сайыннарарга дьулуурдаах үөрэнээччилэри арыйар, алын кылаас оҕолорун үөрэххэ көҕүлүүр соруктаах ыытыллар.
Быйылгы күрэс икки түһүмэхтэн турда: виртуальнай (тэйиччиттэн) уонна очнай (сирэй күрэс). Виртуальнай түһүмэххэ 34 кыттааччы видео-визиткатын сыаналаатылар. Дьүүллүүр сүбэҕэ улууспут алын сүһүөх оскуолаларын педагогтара үлэлээтилэр. Бастакы түһүмэҕи туораабыт 20 финалист түмүктүүр түһүмэххэ анал тургутар туурдары ааста. Тыҥааһыннаах күрэс түмүгүнэн кыайыылаах тахсан, бу сыл “Саҥа көлүөнэ бастыҥ үөрэнээччитэ” ааты А.П. Павлов аатынан Сунтаардааҕы 1 №-дээх орто оскуола 4-с кылааһын үөрэнээччитэ Васильев Дэвид ылла. Маны таһынан лауреаттар ааттаннылар, анал ааттар иҥэрилиннилэр.
Бу куоҥкуруска улууспут оскуолаларыгар бэртээхэй толкуйдаах, айар куттаах, талба талааннаах оҕолор баалларын өссө төгүл көрөн, тэрийээччилэр олус астыммыттарын, киэн туттубуттарын биллэрдилэр, кыттааччыларга махтаннылар.
“Сунтаар сонуннара” хаһыат.