Сана дьылбыт буолара чугаһаатар чугаһаан иһэр. Бу – киһи олоҕор аптаах күн. Ол эрэн, киһи бу кэмҥэ айманар, долгуйар. Саамай долгутуулаах, түбүктээх кэмҥэ киһи ис туругун, биир кэм тута сылдьарын курдук, бырааһынньык тыыныгар ыгылыйбакка хайдах бэлэмнэниэн сөбүй?
1. Былаан. Айманыы, санаа түһээһин үксүн дьыалаҕар ыһыллыы-тоҕуллуу баар буоллаҕына үөскүүр. Маны, этэҥҥэ аһардарга ахсынньы маҥнайгы күнүттэн эрдэ саҕалыыр ордук. Тугу, хаһан, хаска ылан, бэлэмнээн, киэргэтэн былаанныыр ордук буолар. Ол испиэһэккэ сынньанар, күүс ылар бириэмэ эмиэ баар буолуон наада. Сынньанар кэм эбэһээт баар буолуохтаах.
2. Сыл бүтэһигэр барытын бүтэрэ сатыыры токкуйдаамаҥ. Барытын анааран, кэтээн көрүҥ Тохсунньуга сорох, ханнык дьыала көһүөн сөбүн көрөн онно көһөрүөххэ сөп. Холобур: улахан дьиэ хомунуу эбэтэр саҥа дьыл түүнүн кэнниттэн аймахтаргытын көрсөр былааннаах буоллаххытына, бэлэххитин ол кэмҥэ ылан бэлэмниэххитин сөп.
3. Барытын бэйэҕит эрэ оҥоро сатаамаҥ. Чугас дьоҥҥутуттан, аймахтаргытыттан көмөтө көрдөөҥ. Аҥаардас бэйэҕит түбүгүрдэххитинэ, Саҥа дьыллааҕы настарыанньаҕыт суох буоларын таһынан, күүскүт-сэниэҕит баранан биллэ сылайыаххытын сөп.
4. Саҥа дьыл уларыйыы аҕаларын күүтэ сатаабакка, эрдэттэн ону киллэрэ сатааҥ.
5. Саҥа дьыллааҕы сүпсүлгэни сөбүлээбэт буоллаххытына, Сана дьыллааҕы аһылыккытын, бэлэхтэргитин онлайн сакаастыаххытын сөп. Кыыһырыы, ыгылыйыы үксүн баҕарбыккыт, былааннаабыккыт курдук буолбатаҕыттан тахсар.
6. Чугас дьоҥҥун кытта кыыһырсыы, өйдөспөт буолуу тахсыбатын курдук бытаара, уоскуйа түһүн.
Уһун өрөбүллэр кэннэ үлэҕэ тахсарга эрдэттэн бэлэмнэнэн, күннээҕи эрэсиими сааһыыланар, сөпкө кэмигэр аһыыр, бириэмэни сөптөөхтүк аттаран былаанныыр ордук.
Барыгытын кэлэн иһэр 2025 саҥа сылынан! Баҕарабын бу саҥа сылга үгүс үөрүүнү, элбэх дьоллоох түгэни, үтүмэн ситиһиилэри, дьиэ кэргэҥҥэ өйөһүүнү-өйдөһүүнү.
Татьяна Антипина, СӨ психологическай киинин,
Сунтаардааҕы филиалын психолога