Сана дьылбыт буолара чугаһаата. Бу бэйэтэ туһунан аптаах, алыптаах кэм. Ол эрэн киһи бу кэмҥэ айманара, долгуйара баар суол. Ол курдук, дьон оҥорор бэлэҕин буларга тиэтэйэр, бырааһынньыктааҕы остуол тардааһынын толкуйдуур, о.д.а. Маны барытын ситиһэргэ бириэмэ тиийбэт курдук буолан хаалар.
Бу түгэҥҥэ хайдах долгуйбакка, аймаммакка дьаһаныахха сөбүй?
Уопсайынан, маннык аймалҕаннаах кэмҥэ киһи ис туругун халбаҥнаппакка, көтөҕүллүбүт сүргэтин ыһыктыбакка, бырааһынньыкка стреһэ суох бэлэмнэнэригэр манныгы сүбэлииллэр:
- Былааннаныҥ. Айманыы, санаа түһүүтэ биир үксүн дьыала-куолу ыһыллаҕас, бутуурдаах (хаос) түгэнигэр буолар. Онон эрдэттэн, ахсынньы саҕаланыытыттан тугу, хаһан, хаска гынары былааннанар ордук. Уонна бу былааны тутуһа сатыахха наада. Ол ылыммыт былааҥҥа сынньанарга, күүс ыларга бириэмэ эмиэ аттарыллыбыт буолуохтаах.
- Сыл бүтэһигэр барытын бүтэрэ, үмүрүтэ сатыырга дьулуһумаҥ.Барытын анааран, кэтээн көрүҥ, сорох түбүгү тохсунньу ыйга да уталытыахха сөбүн көһөрөн биэриҥ.
- Барытын бэйэҕит эрэ оҥоро сатаамаҥ. Дьиэлээхтэргитин, чугас дьоҥҥутун, аймахтаргытын көмөлөһүннэриҥ. Аҥаардас бэйэҕит түбүгүрдэххитинэ, Саҥа дьыллааҕы настарыанньаҕыт суох буоларын таһынан, күүскүт-сэниэҕит баранан биллэ сылайыаххытын сөп.
- Саҥа дьыллааҕы сүпсүгүрүүнү сөбүлээбэт буоллаххытына, Сана дьыллааҕы аһылыккытын, бэлэхтэргитин онлайн сакаастыаххытын сөп. Кыыһырыы, ыгылыйыы үксүн баҕарбыккыт, былааннаабыккыт курдук буолбатаҕыттан тахсар.
- Чугас дьоҥҥутун кытта кыыһырсыы, өйдөспөт буолуу тахсыбатын курдук, холкутуйа, уоскуйа түһүҥ.
Уһун өрөбүллэр кэннэ үлэҕэ тахсарга эрдэттэн бэлэмнэнэн, күннээҕи эрэсиими сааһыыланар, сөпкө кэмигэр аһыыр, бириэмэни сөптөөхтүк аттаран былаанныыр ордук.
Барыгытын кэлэн иһэр 2024 сана сылынан! Баҕарабын бу сана сылга үгүс үөрүүнү, элбэх дьоллоох түгэни, үтүмэн ситиһиилэри, дьиэ кэргэҥҥэ өйөһүүнү-өйдөһүүнү.
Татьяна АНТИПИНА,
Өрөспүүбүлүкэтээҕи психология киинин Сунтаардааҕы филиалын педагог-психолога.