“Бу саас чалбах-бадараан саҕана кэтэ сылдьар соппуоскам эмискэ алдьанан хаалан атах таҥаһа суох хааллым. “Родственник в городе” диэн Дьокуускай куораттан араас табаардары атыылаһан ыытар өҥө баарын истэммин, кинилэргэ тутатына таҕыстым. Эбиэттэн киэһэ атах таҥаһын маҕаһыыныттан сөбүлүү көрбүт соппуоскабын ыллардым. Ол күн таксинан Сунтаарга ыыттылар. Сарсыарда үлэбэр барарбар саҥа атах таҥастаах бардым. “Родственник в городе” түргэн-тарҕан үлэһиттэригэр махталбын тириэрдэбин, үүнэ-сайда туруҥ!” диэн Сунтаар нэһилиэгин олохтооҕо Ирина Афанасьева “Сунтаар сонуннарын” эрэдээксийэтигэр суруйар.
“Родственник в городе” диэн туох, хайдах үлэлиирин билсээри бу араас өҥөнү оҥорор тэрилтэни төрүттээбит салайааччытыгар Сунтаар уолугар Сергей Петровка тахса сырыттыбыт. “Куоракка көһүөхпүттэн мэлдьи дьоммор, аймахтарым көрдөһүүлэринэн наадыйалларын булан ыытарым. Онтон 2021 сылтан урбаанньыт быһыытынан тэрилтэбин бэлиэтээбитим. Сүүрэр-көтөр, булар-талар, сытыы-хотуу уолаттары үлэҕэ ылбытым. Хоту улуустарга, ыраах-чугас сытар дэриэбинэлэргэ, куораттарга массыына саппаас чааһын, эмп-томп, таҥас-сап, дьиэ туттар матырыйаалга уо.д.а тиийэ атыылаһан ыытабыт. Өҥөбүт иһин кыра төлөбүр ылабыт. Дьон биһиги оҥорор үлэбитин истиһэн тиийэллэр. Ааппыт да этэрин курдук, хас биирдии килийиэммитигэр аймахпытыгар курдук сыһыаннаһабыт. Бу биһиги үлэбит сүрүн соруга буолар. Инники былааммытыгар анал сыһыарыы толкуйдаан үлэлэтиэхпитин баҕарабыт. Ону тэҥэ оҥорор үлэбит көрүҥүн элбэтэбит”. Маны таһынан “Родственник в городе” үлэһиттэрэ аэропортан көрсөн гостиницаҕа, дьиэҕэ таһаараллар, балыыһаҕа ыарыһахха наадыйарын илдьиэхтэрин сөп, үөрүүлээх түгэнинэн сибэкки дьөрбөтүн, бэлэх илдьэн туттарыахтарын эмиэ сөп эбит. Онон Сунтаар киириилээх-тахсыылаах, куорат тэтиминэн олорор уолаттарга 89241799949 нүөмэринэн билсиэххитин сөп.
Мира АФАНАСЬЕВА