«Азия оҕолоро» норуоттар икки ардыларынааҕы спортивнай оонньуулар Саха Өрөспүүбүлүкэтин бастакы Бэрэсидьиэнэ Михаил Николаев көҕүлээhининэн, 1996 c. ыла ыытыллаллар.
Биһиги улууспутуттан «Азия оҕолоро» спортивнай оонньуу ыытыллар сылын аайы эдэр спортсменнарбыт куруук кытталлар. Ситиһии төһө да сэмэйин иһин, баар.
Бастакы сырыыга, 1996 сыллаахха, биһиги улууспутуттан 16 саастаах Сидоров Саша буоксаҕа кыттар путевканы ылан барбыта. Кини сэрэбиэй быһыытынан бастакы киирсиэхтээҕэ. Ол эрээри, уолчаан эчэйии ылан күрэхтэһииттэн туоруур, кини оннугар Ньурбаттан Балашкин Георгий киирсэр. Александр улууска, да өрөспүүбүлүкэҕэ да элбэҕи эрэннэрэр үүнэн иһэр спортсмен этэ. Хомойуох иһин Александр бу олохтон эрдэ туораахтаабыта. Кини успуорт бу көрүҥэр үгүс күрэхтэһиилэргэ кыттан, ситиһиитэ да элбэҕэ.
Оттон иккис оонньууга, 2000 сыллаахха, Сунтаар улууһуттан икки уол кыттыбыта – сүүрүүгэ Чириков Миша, мас тардыһыытыгар Ефремов Петя.
Бу оонньууларга Петя 60 киилэҕэ иккис миэстэ буолбута. Петя ол саҕана оскуоланы саҥа бүтэрбит 17 эрэ саастаах уолчаан этэ. Кини бу бастакы улахан, эппиэттээх күрэхтэһиигэ өрөспүүбүлүкэтин хамаандатыгар олус наадалаах очукуону биэрэн олус да үөрбүтэ. Уолчаан бу маннык улахан таһымнаах күрэхтэһиигэ дьонун, эрчийэр, дьарыктыыр тириэньэрин түһэн биэрбэтэҕиттэн олус да долгуйда этэ.
Петр бу мантан ыла успуордунан утумнаахтык дьарыктанан барар. Кэлин үөрэнэ да сылдьан, араас күрэхтэһиилэргэ ситиһиилээхтик кыттыбыта. Билигин да дьарыгын бырахпат. Успуордунан дьарыктанан эт-сиин өттүнэн сайдыытыгар, дьулуурдаах, тулуурдаах буолууга иитиллэн тахсыбыта. Ол хаачыстыбата билигин үлэлиир үлэтигэр улахан оруоллаах буолара саарбахтаммат. Кини Арассыыйа ИДьМ Сунтаардааҕы отделын силиэстийэлиир салаатын силиэдэбэтэлэ, юстиция старшай лейтенана.
«Азия оҕолоро» норуоттар икки ардыларынааҕы II спортивнай оонньууга кыттыбыппын билигин да күндүтүк саныыбын. Бу бастакы улахан эппиэттээх күрэхтэһиим буоллаҕа. Олус да долгуйбутум, ол эрээри ситиһиилээхтик кыттан, иккис миэстэни ылан бэйэбэр эрэлим күүһүрбүтэ», — диэн Петр Иванович ол 23 сыл анараа өттүгэр эппиэттээх күрэхтэһиигэ кыттыбытын долгуйа ахтар.
«Азия оҕолоро» норуоттар икик ардыларынааҕы спортивнай оонньуу бастакы ыытыллыаҕыттан биһиги өрөспүүбүлүкэбитин киинигэр — Дьокуускайга үгүс элбэх спортивнай эбийиэк тутулунна, саҥардылынна. Ону сэргэ бу оонньуулартан тирэх ылан, билигин Олимпиада кыайыылаахтара, үрдүк ааттаах-суоллаах спортсменнар таҕыстылар. Өрөспүүбүлүкэбитигэр успуорт сайдыыта, дьон успуордунан дьарыга улаатта. Бу кэлиҥҥи биэс сылга араас бырагырааманан, ол иһигэр дойду Бэрэсидьиэнэ Владимир Путин көҕүлүүр национальнай бырайыактарынан өрөспүүбүлүкэбитигэр 32 улахан спортивнай эбийиэк үлэҕэ киирдэ.
Дойдубут Бэрэсидьиэнэ Владимир Путин «Азия оҕолоро» спортивнай оонньуулара бастыҥ бырайыак уонна успуорка ситиһиилээх оҕолор үүнэн-сайдан тахсалларыгар кыаҕы биэрэр тэрээһин диэн бэлиэтиир.
#достиженияДФО #5летразвитияДФО
Яина ВЛАСЬЕВА