Бүгүн төһө да сөрүүн, тыаллаах күн буоллар, Кэмпэндээйибит оскуолатын таһыгар араас сибэкки дьөрбөтүн туппут кыра да, улахан да оҕолор, учууталлар, төрөппүттэр Билии күнүгэр тоҕуоруһа муһуннулар. Быйылгы үөрэх дьылыгар биһиги оскуолабыт улууска тэриллибит политехническай хайысхалаах оскуолалар ситимнэригэр киирэн саҥа кэрдиискэ үктэннэ. Бу сылга 72 үөрэнээччи оскуолаҕа, уһуйааҥҥа 19 кырачаан билиилэрин хаҥатан үөрэниэхтэрэ. Оскуола салайааччыта Владимир Семенов уһуйаан, оскуола боруогун саҥа атыллыыр оҕолору, учууталлары, төрөппүттэри эҕэрдэлээтэ, политехническай ситим туһунан сырдатта. Бастакы кылааска үөрэнэ киирбит 7 үөрэнээччини учууталлара Карина Григорьева сиэтэн, маҥнайгы кылаас чаастарыгар киллэртээтэ.
Татьяна МЕСТНИКОВА.