Быйыл Сунтаар 2-с нүөмэрдээх оскуола 60 сылын бэлиэтиир үбүлүөйдээх сыла. Ол чэрчитинэн оскуола биир кылааһыгар түмэл тэрийбиттэрин көрө тахса сырыттым. Түмэли библиотекарь Светлана Федорова Светлана үлэлэтэр. Хас биирдии стенданы сиһилии кэпсээн билиһиннэрдэ.
Түмэл үксэ бу оскуоланы бүтэрбиттэр биэрбит матырыйаалларынан тэриллибит. Араас выпустар оҥорбут альбомнара, стендэҕэ үлэлээн ааспыт учууталлар, тэрилтэлэр,олохтоох сэрии бэтэрээннэрин хаартыскалара ыйаммыттар.
Бу оскуоланы биһиги кылаас бүтэрбиппит 50 сыла буолар. Хомойуох иһин кылааспыт хаартыскатын да булан көрбөтүм. Мин өйдүүрбүнэн урукку өттүгэр иккитэ мусуой тэриллэ сылдьыбыт буолуохтаах. Оскуола умайан онно былдьаммыт буолуон сөп .
Түмэли көрө сырыттахпына, оҕолор киирэннэр «мин ийэм манна үөрэммит, ону көрө киирдибит» дэһэннэр сүрдээх интэриэстээхтик көрдөөн хаартыскаҕа түһэрдилэр. Онон түмэл араас матырыйаалларынан байытыллан улаатыан наада. Оскуоланы бүтэрбит оҕолор тус бэйэлэрин, кылаастарын туһунан матырыйаал биэрдэхтэринэ, киэҥ историялаах түмэл буолуо этэ. Олохпут историята оскуолабыт саҕаттан саҕаланар, онтон ону үйэтитэргэ араас түмэл тэриллэрэ, тус бэйэбин үөрдэр.
Ханна да бардарбын түмэлгэ сылдьарбын ордороробун, онтон киһи элбэҕи билэ , мунаарар да боппуруостаргар эппиэти булар дьикти түгэннэрдээх буолар. Саҥа силис тардан эрэр түмэл араас матырыйаалларынан хааччыллан үүнэ-чэчирии сайдарыгар күүс-көмө буолуоҕуҥ.
Розалия СИДОРОВА-ЫМЫЫЧААНА