Сунтаардааҕы Ис Дьыала уорганын сокуоннай саастарын ситэ илик оҕолору кытта үлэлиир салаа иһитиннэрбитинэн, оҕолор дьээбэлэнэн, оонньоон “ложный вызов” оҥорон, тустаах уорганнары ыҥырбыттара хас да түгэн бэлиэтэнэн турар.
Холобура, 2015 с. төрүөх оҕоҕо доҕоро оонньуу кэлбитигэр 112 нүөмэргэ эрийэннэр “Арыгыһыт киһи биһигини өлөрөн эрэр” диэн баран төлөпүөннэрин быраҕан кэбиспиттэр. Тутатына полиция үлэһиттэрэ эрийбит нүөмэринэн кимин, тугун ирдэһэн “кырачаан дьээбэлэнээччилэр” буолалларын түргэн кэм иһинэн быһаарбыттар. Эмиэ бу курдук ис хоһоонноох иһитиннэриини полиция үлэһиттэрэ бу аҕыйах хонуктааҕыта эмиэ туттулар. Ол курдук, 2011 сыллаах төрүөх оҕо эмиэ дьээбэлэнэр санааттан 112 нүөмэргэ эрийэн тиийэн “Быыһааҥ, абырааҥ…” диэн баран төлөпүөнү ууран кэбиспит. Иһитиннэрии кэнниттэн ким нүөмэриттэн эрийэллэрин быһааран, оҕоҕо туох да куттал суоһаабатын билэн баран эмиэ оҕону, төрөппүттэрин кытта кэпсэтии олохтоотулар. Хас биирдии киһи полиция дьуһуурунай чааһыгар эрийэн тиийэр түгэнигэр кинилэр иһитиннэриилэрэ болҕомтоҕо ылыллан быһаарыы, ирдэһии үлэтэ барарын өйдүөх тустаахтар.
Оҕолор өттүлэриттэн киһи өйүгэр-санаатыгар баппат түгэннэр эмиэ буолаллар эбит. Ол курдук, Сунтаар нэһилиэгин оскуолатын обургу саастаах үөрэнээччитэ дьүөгэтин дьээбэлиир санааттан саҥа сим карта атыылаһан баран киниэхэ: “Оскуола дискотекатыгар терракт бэлэмниибит. Мин дьонум сэбилэнии (оружие) биэриэхтэрэ. Сөбүлэһэҕин дуо?” диэн иһитиннэрии ыыппытын дьүөгэтэ соһуйан учууталларыгар биллэрэр. Бу түмүгэр улахан сүпсүлгэн тахсар. Билигин дойдуга терроризмы кытта охсуһуу күүстээхтик сытыылаан турар кэмигэр маннык оонньуур, дьээбэлэнэр сөбө суох. Ону оҕолорбут эмиэ өйдүөх тустаахтар.
Полиция старшай лейтенана, саастарын ситэ илик оҕолор сулууспаларын инспектора Александра Иванова: “Ложный вызов” иһитиннэрии иһин РФ КоАП 19.13ст. эппиэтинэскэ тардыллыахха сөп. Онтон бу кырачаан дьээбэлэнээччилэр саастара ситэ илик буолан эппиэтинэскэ тардыллыбатылар. Өйдөтүү-сэрэтии үлэтин эрэ ыыттыбыт. Эмиэ да үөрүөх тустаахпыт, оҕолор суһал сулууспалар нүөмэрдэрин эндэппэккэ билэллэриттэн. Ол эрэн, төрөппүттэр оҕолоругар хайаан даҕаны суһал сулууспаларга дьээбэлэнэн эрийбэттэрин өйдөтөн кэпсэтиэхтэрин наада. Онтон обургу оҕо оонньообута оҕус буола сыста. Дьоҥҥо куттал суоһаабытын туһунан дьээбэлэниитэ РФ УК 207ст.1ч. эппиэтинэскэ тардыллыахха сөп. Ол эрэн бу оҕо 14 сааһын туола илигинэн дьыала көбүтүллүбэтэ. Билигин бу дьээбэлэммит оҕоҕо өйдөтүү-сэрэтии үлэтэ уонна төрөппүттэригэр боротокуол толорулунна” диэн иһитиннэрдэ.
Мира АФАНАСЬЕВА