Бүгүн, Сунтаар Ытык Ыһыаҕын бастакы күнүгэр Алгыс Ураһатыгар биир эмиэ үтүө тэрээһин буолла.
Ол курдук, улуус дьокутааттарын Сэбиэтин бэрэссэдээтэлэ Ульяна Попова бэртээхэй толкуйун олоххо киллэрэн, «Олоҥхо дойдутун ытык күнэ, Сунтаар уйгулаах ыһыаҕа» кинигэ-альбомун сүрэхтэниитэ буолла.
Альбом-кинигэҕэ улууспут былырыыҥҥы ыһыаҕыттан араас хаартыска киирбит. Альбомҥа ким баҕарар бэйэтин, доҕотторун, чугас дьонун булан көрүөн сөп.
Альбому Ульяна Дмитриевнаны сэргэ улуус култууратын управлениетын исписэлииһэ Евдокия Сивцева, фотограф Дмитрий Буринын хомуйан оҥорбуттар.
Өйдүүргүт буолуо, былырыын ыһыахпытын Москва куораттан ааттаан-суоллаан кэлэн фотограф кэлэн түһэрэ сылдьарын. Ол бу кинигэ-альбомҥа ыһыах түгэннэрин хаартыскаларынан үйэтиппит — Дмитрий Буринын. Кини бүгүҥҥү күҥҥэ видеосибээһинэн альбом тахсыбытынан уонна улуус олохтоохторун ыһыаҕынан эҕэрдэлээтэ.
Ону сэргэ альбомҥа Елена Шестакова, Роман Уаров, Вячеслав Борисов, Евдокия Сивцева түһэрбит хаартыскалара киирбиттэр.
Альбом бастакы сирэйдэрин арыйдахха улууспут баһылыга Анатолий Григорьев, улуус култууратын уонна айылгытын управлениетын салайааччыта Саргылана Омукова киирии тылы суруйбуттарын ааҕа олорон Сунтаарбыт ыһыаҕынан киэн тутта саныыгын, бу альбому оҥорорго толкуйдаабыт ытыктабылллаах Ульяна Дмитриевна чахчы да үйэлээҕи оҥорбут эбит дии саныыгын.
Альбом 10-тан тахса түһүмэххэ араарыллыбыт. Ааспыт сыллааҕы ыһыаҕы үйэтитэн бэртээхэй альбомҥа үлэлээбит дьоммутун улуус култууратын уонна айылгытын салаатын начальнига Саргылана Омукова истиҥ тылларынан эҕэрдэлээтэ, бэлэх туттартаата.
Яина ВЛАСЬЕВА