СӨ доруобуйатын харыстабылын миниистирин бастакы солбуйааччыта Дмитрий Дмитриевич Сергин салайааччылаах бырабыыталыстыба отчуотун туруорар бөлөх иккис күнүн уһук сытар нэһилиэктэргэ Бүлүүчээҥҥэ, Наахараҕа, Кириэстээххэ үлэлээтэ.
Бүлүүчээн нэһилиэгин олохтоохторо СӨ Бырабыыталыстыбатын үлэтин-хамнаһын көрдөрөр-иһитиннэрэр ханаалларынан көрө-истэ олоробут. Ол иһин, тутатына ааспыт сылга туруорсубут этиилэрин ырытааһыҥҥа киириэххэ диэн санааларын эттилэр. Ол курдук, олохтоохтор нэһилиэккэ аптека үлэтин туруорсубуттара туолбутун эттилэр.
Доруобуйа харыстабылын мобильнай биригээдэтэ Бүлүүчээн нэһилиэгэр кулун тутар 18 күнүгэр кэлиэҕэ диэн эттилэр.
Санатан этэр буоллахха, Дмитрий Сергин Сунтаар улууһугар Бырабыыталыстыба отчуотугар 3-с кыттыыта буолар. Ол иһин, улууска буола турар үлэни-хамнаһы, кыһалҕаны үчүгэйдик билэрэ көстөр. Отчуокка сатаан кыттыыны ылбат дьон ыйытыктарын суругунан, социальнай ситимнэринэн биэриэхтэрин сөп. Маннык көрсүһүүлэргэ дьон интэриэһиргиир ыйытыктарыгар тустаах тэрилтэ үлэһиттэриттэн тутатына хоруй ылаллар, санааларын аһаҕастык этэллэр.
Бүлүүчээн олохтоохторо сүрүннээн нэһилиэктэригэр саҥа тутуулары, врачебнай амбулаторияҕа хапытаалынай өрөмүөн туруорсаллар. Сунтаар улууһун баһылыгын бастакы солбуйааччы Павел Григорьев олохтоохторго улууска саҥа эбийиэктэри тутууга, өрөмүөҥҥэ ханнык тосхоллорунан үлэлииллэрин иһитиннэрдэ: «Бүлүүчээҥҥэ лиссиэй-интэринээт тутуута өрөспүүбүлүкэ инвест бырагырааматыгар киирэн турар. Өрөспүүбүлүкэ үрдүнэн уочаракка 9 миэстэҕэ турар».
Салгыы, бөлөх кыттыылаахтара миэстэтигэр тиийэн өрөмүөҥҥэ наадыйар врачебнай амбулатория дьиэтин көрдүлэр. Эбийиэк 1994 с.тутуллубут. Бүтэһиктээҕин хапытаалынай өрөмүөн 2004с. барбыт. Төһө кээмэйдээх үлэ барыахтааҕын уонна ханнык тосхолунан өрөмүөн барыан сөптөөҕүн сүбэлэстилэр.
Күн иккис аҥарыгар бөлөх кыттыылаахтара Наахараҕа тиийдилэр. Төһө да Наахара нэһилиэгэ аҕыйах ахсааннаах нэһилиэктэргэ киирдэр, отчуот кыттыылаахтарыгар туруорбут ыйытыылара олус оруннаах уонна дьоһуннаах буолла, ыллыктаах санааларын үллэһиннилэр. Ол курдук, өрөспүүбүлүкэҕэ уматык оҥорор собуот баар буоллаҕына дьоҥҥо тарҕанар сыаната удамыр буолуо этэ диэтилэр. Наахаралар бэйэлэрэ киэн туттар киһилэрин И.Я.Тукайнов аатын үйэтитиигэ үлэлэһэллэрин эттилэр. Билиҥҥитэ Тукайнов олорбут дьиэтин сөргүтэн «Дом-усадьба» оҥоруохтарын баҕараллар эбит. Маныаха Ил-Түмэн дьокутаата Андрей Николаев олус кэскиллээх үлэни ыыта сылдьалларын бэлиэтээтэ. Онтон култуура министиэристибэтэ архыыпка үлэҕэ көмөлөһүөхпүт диэн олохтоохторго эрэннэрдэ.
Бу күҥҥэ түмүктүүр үһүс отчуот Кириэстээх нэһилиэгэр турда. Бырааттыы Сидоровтар ааттарынан успуорт саалатыгар 100-тэн тахса киһи муһунна. Доруобуйа харыстабылын тутаах үлэһитэ кэлбитинэн элбэх ыйытык медицина эйгэтиттэн киирдэ. Холобура, харах бырааһыгар көрдөрөр кэккэ ыарахаттардааҕын эттилэр. Маныаха Дмитрий Сергин офтальмологичечкай сулууспа биригээдэтэ Сунтаарга кэлэр былааннааҕын эттэ. Ону таһынан, улууска «Ростелеком» хампаанньа интэриниэт ситимин тарҕатыыыга соҕотох тэрилтэ үлэтин астымматтарын биллэрдилэр. Бу саас Кириэстээх нэһилиэгэр саҥа, таас култуура дьиэтэ киирээри бэлэмнэнэнэр. Бүгүҥҥү күн туругунан үлэ 90% ситэн турар. Саҥа кулуупка эбии үлэһит ахсаанын боппуруоһа быһаарыллыбытын эттилэр. Быйылгыттан «Тыа сирин култууратын үлэһитэ» диэн саҥа федеральнай тосхол үлэлиэхтээх. Ол эрэн, бу тосхолунан хоту эрэ улуустарга үлэлии барааччыларга 11 квота көрүллүбүт.
Отчуокка тутатына миэстэтигэр тустаах үлэһиттэргэ сорудахтары биэрдилэр. Онон бүгүҥҥү отчуот олус таһаарыылаахтык уонна ситиһиилээхтик ааста.
Мира АФАНАСЬЕВА