Өрөспүүбүлүкэтээҕи психологическай киин дириэктэрин солбуйааччы, байыаннай дьайыы кыттыылаахтарын кытары ыкса үлэлэһэр уопуттаах психолог Октябрина Туприна бүгүн улуус дьаһалтатын аактабай саалатыгар «Проблематика психологической трансформации в период социальных перемен» диэн ааттаах сэминээри иилээн-саҕалаан ыытта. Кини идэтигэр олус бэриниилээх буолан, элбэх сыл устата муспут киэҥ билиитин, баай уопутун атын дьоҥҥо тириэрдэр, тарҕатар соруктаах үлэни ыытар. Октябрина Ксенофонтовна Өрөспүүбүлүкэтээҕи психологическай киини 25 сыл анараа өттүгэр төрүттээбит уонна онно 7 сыл салайааччынан үлэлээбит. Күн бүгүн эдэр салайааччы Владимир Скрябины кытта тэҥинэн олус таһаарыылаахтык өрөспүүбүлүкэ үрдүнэн 20-тэн тахса филиаллаах үлэлии-хамсыы олороллор. Билиҥҥи уустук кэмҥэ кинилэр үлэлэрэ саамай тоҕоостоох.
Саха дьоно санаатын аһаҕастык этиммэт, иһигэр тута сылдьар. Этиһии бастакы төрүөтэ ыгылыйыыттан, күүрүүттэн тахсар. Онон, бэйэбит өйбүтүн-санаабытын сайыннаран аһаҕастык кэпсэтэ үөрэниэхтээхпит. Киһиэхэ саамай кэпсэтии, дьону кытары алтыһыы наада. – диэн Октябрина Туприна эппит тыла оруннаах.
Сэминээргэ тэрилтэ салайааччылара, нэһилиэк баһылыктара, психологтар, уопсастыбанньыктар кыттыыны ыллылар. Кыттааччылар лектор кэпсиирин сэргээн иһиттилэр, боппуруостары биэрдилэр, бэйэлэрин санааларын эттилэр. Саамай долгутуулаах түгэнинэн, Октябрина Ксенофонтовна анал байыаннай дьайыыга баран госпиталларга үлэлээбит, Таатта улууһун психолога Айталина Филиппова суруйбут эссетын ааҕан иһитиннэрбитэ буолла. Сэминээр кыттыылаахтара бары да уйадыйа иһиттилэр. Бу курдук байыастарга көмөлөһөр, сүбэ-ама биэрэр, ис туругу көннөрөр элбэх психолог суруйбут суруйууларын барытын биир папкаҕа тиһэн, кичэллээхтик илдьэ сылдьар. Салгыы төгүрүк остуол ыытылынна. Сэминээр кыттыылаахтара туоһу сурук туттулар.
Бу курдук, Өрөспүүбүлүкэтээҕи психологическай киин Сунтаарбыт улууһугар икки күн устата методическай көмөнү оҥорор сыаллаах үлэлээтилэр. Салгыы айаны Ньурба, Үөһээ Бүлүү, Бүлүү улуустарыгар туттулар.
Елизавета ТИТОВА