Сунтаарга бастакы “ОйууLOOK” анимационнай ойуулуктары оҥоруу күрэһигэр 10 саастаах Кирилл Николаев үлэтэ бастыҥынан ааттаммыта. Кирилл ненец остуоруйатыгар олоҕурбут “Кэҕэ” диэн ааттаах бастакы ойуулуга таһымнаах күрэскэ ситиспититтэн ордук аҕата, улууска биллэр ойуулук оҥорооччу Анатолий Афанасьев үөрбүтэ.
Ураты дьоҕурдаах оҕо туһунан кини аҕатын кытта кэпсэттибит. “Кирилл аан бастаан 7 саастааҕыттан төлөпүөҥҥэ ойуулук оҥорон саҕалаабыта. Бырагыраамаҕа бэйэтэ үөрэммит этэ. Ютуб каналыгар уган саҕалаабыта. Ол онно оҕом ойуулук оҥорууга дьоҕурдааҕын өйдөөн көрбүтүм. Персонажтарын хамсаныылара чуолкай, сааһыламмыт диэн бэлиэтээбитим. Ол кэнниттэн оҕом дьоҕурун өйөөммүн, дьарыктанар усулуобуйатын тэрийбитим. Ийэтэ эмиэ олуһун өйөөбүтэ. Кини билигин 3D моделированиены баһылыы сылдьар. Эмиэ бэйэтэ үөрэнэр. Кирилл таһыма биллэ тубуста. Билигин иккиэн “Саха” НКИХ сакааһынан ойуулук оҥоро сылдьабыт.
“Кэҕэ” ойуулугу оҥорорбутугар бастаан остуоруйабытын талбыппыт. Оҕобор хас да остуоруйаны аахпытым. Онтон кини сөбүлээбит остуоруйатын кэпсэтэн харахпытыгар ойуулаан көрбүппүт. Оҕо бэйэтэ интэриэстээх буоллаҕына ис дууһатыттан баҕаран туран үлэлиир, дьарыктанар. Саҥардааһынын (озвучка) эмиэ бэйэбит аахпыппыт. Ийэ-кэҕэ куолаһа – Кирилл кылааһын салайааччыта. Кирилл оҕо оруолун аахпыта, мин – ааптар. Онтон уруһуйун, дьоруойдарын эмиэ Кирилл бэйэтэ толкуйдаабыта. Оҕолор маннык сирэйдээх-харахтаах, таҥна-сапта сылдьыахтаахтар диэн лиискэ уруһуйдаан түһэрбитэ. Ойуулук 3D фоннарын барытын бэйэтэ оҥорбута. ”Кэҕэ” ойуулукпут өссө да атын күрэстэргэ ситиһиилээхтик кыттар. Бу соторутааҕыта өрөспүүбүлүкэтээҕи күрэскэ 1 истиэпэннээх дипломант буолбута. Кирилл 20000 солк. наҕараадаламмыта.
Мин көрүүбүнэн Кирилл ордук ойуулук оҥорор бырагырааманы баһылаабыт. Бэйэтэ дьаныһан, баҕаран туран үөрэммитэ. Ардыгар мин киниттэн ыйытар да, сүбэлэтэр да түгэннээхпин. Иккиэн атын-атын уруһуйдуур техникалаахпыт. Кини “покадровай” ньыманы ордук туттар. “Дисней” хампаанньа ойуулуктара “покадровай” буолар. Сөкүүндэҕэ 6-24 уруһуй түһэриэхтээх. Ити курдук уустук тиэхиньикэни туттар. Ойуулук оҥорууга миигин көрөн үөрэммитэ, тардыспыта буолуо дии саныыбын. Куоракка улааппыт буолан нууччалыы иитиилээх. Билигин Сунтаарга сахалыы кэпсэтэргэ үөрэнэбит. Салгыы компьютер оонньуутун оҥорор былааннаах. Ол иһин, программированиены баһылаатын диэн сатабыллаах уһуйааччыга үөрэттэрэр санаалаахпын.
Оҕо төлөпүөҥҥэ таах оонньоон, видео көрөн күнүн-дьылын барыан оннугар сөптөөх дьарыгы, хайысханы ыйан биэрдэххэ сөбүлүүр дьарыктарын булаллар эбит дии санаатым”.
Оҕо талаанын сайыннарыыга саамай төрөппүт өйөбүлэ, эрэлэ уонна таптала наада.
Мира АФАНАСЬЕВА