Олунньу 15-16 күннэригэр дьолллоох Дьокуускай куорат «Дохсун» успуорт киинигэр саха төрүт оҕунан ытыыга «Байанай бэлэҕэ» күөн күрэс өрөспүүбүлүкэбит араас муннуктарыттан 500 оҕунан ытааччыны түмэн, хаһан да буолбатах элбэх кыттааччылаах бэрт тыҥааһыннаах күрэхтэһии буолан ааста.
Сунтаарбыт улууһуттан барыта 17 кыттааччы Ньургуйаана Петрова салалтатынан куһаҕана суохтук кытыннылар. Олор истэригэр 4 оскуола үөрэнээччитэ Сунтаартан Нелли Лукина уонна Дьаархан орто оскуолатыттан Айгыына Павлова, Кэскил Иванов уонна Вадим Пахомов Дьаархан кытыннылар.
Күрэхтэһиини оскуола кыргыттара сарсыарда 9 чаастан «куобах» көрүҥүнэн саҕалаатылар, ол кэннэ бэтэрээн дьахталларбыт, онтон кэрэ аҥардар ыттылар. Күнүс 2 чааска «Байанай бэлэҕэ» күрэхтэһиини үөрүүлээхтик аһыы буолла. Кэлбит үрдүк сололоох ыалдьыттар, оҕунан ытыы федерациятын бэрэссэдээтэлэ Виктор Бурцев бу көрүҥүнэн утумнаахтык дьарыктанааччы балысханнык сайдан иһэрин бэлиэтээн эттилэр. Санатар эбит буоллахха, былырыыҥҥы күөн күрэскэ барыта 200-чэ кыттааччылаах эбит буоллаҕына, быйыл лоп курдук 500 оҕунан ытааччы 26 олбоххо ытта. Оннук эрэ гынан бу күрэхтэһии икки күнүнэн бүттэ. Бастакы күн сарсыарда 9-тан саҕаламмыт күрэхтэһии түүн 12 чааска эр дьон «кус» көрүҥүн ытыытынан түмүктэммитэ.
Иккис күнү оскуола кыргыттара эмиэ 9 чаастан «тииҥ» көрүҥтэн саҕалаатылар. Сунтаар улууһун охчуттарыттан ордук таһаарыылаахтык Таисия Ксенофонтова кытынна. Ол курдук бэйэтин бөлөҕөр (60 сааһыттан үөһээ) «кус» көрүҥэр бочуоттаах үһүс миэстэни ылары ситистэ уонна үс көрүҥ түмүгүнэн бу саха төрүт оҕунан ытыыга 1-кы спортивнай разряды толордо. Таисия Егоровна остуол оонньууларыгар эмиэ Сунтаар улууһун хамаандатын састаабыгар киирэн, улууһун аатын көмүскээтэ.
Ону таһынан Сунтаар улууһун саха төрүт оҕунан тириэнэрэ Наталья Федорова эмиэ 1-кы спортивнай разряды толорон үөрүүтэ үксээтэ. Эр дьоммутугар Борис Уларов 2-с спортивнай разряды толорон, ону таһынан бу күрэх 32 бастыҥ ытааччытын иһигэр киирэн күрэхтэһии муҥутуур кыайыылааҕын эр дьоҥҥо быһаарар ытыыларга киирэн финал 1/8 тиийэн туораата. Спарринговай ытыыларга өрөспүүбүлүкэбит күүстээх охчуттарын туораталаабыта кэрэхсэбиллээх. Наталья Федорова дьахталларга эмиэ 32 бастыҥ көрдөрүүлээх иһигэр киирэн эмиэ финальнай ытыыга 1/8 тиийдэ. Ол аата биһиги охчуттарбыт иккиэн 3-түү киһини туораппыттара.
Абсолютнай кыайыылаахтар 80-нуу тыһыынчаны тутан кыайыы өрөгөйүн биллилэр.
Сунтаарбыт улууһуттан хаһааҥҥытааҕар да элбэх кыттааччы кэлэн кыттыбыта, биһиги улууспутугар саха төрүт оҕунан ытыы федерацията Артем Яковлев салайааччылаах бу олус астык, тыҥааһыннаах күрэх сайдан иһэрин биир туоһута буолар.
Инникитин даҕаны оҕунан ытааччылар кэккэбит хаҥыа, көрдөрүүбүт да тупсуо диэн эрэнэбит.
Павел КЫРЕЛОВ, күрэхтэһии кыттааччыта
Дьокуускай куорат.