Бүгүн кулун тутар 10 күнүгэр, Сунтаар нэһилиэгин «Алмаас»успуорт уораҕайыгар оҕунан ытыыга Арассыыйа успуордун маастара, Саха Өрөспүүбүлүкэтин физическай култуура уонна успуорт туйгуна, саха төрүт оҕунан ытыыга аан бастакы успуорт маастара, Сунтаар улууһун оҕунан ытыыга сүрүн тириэньэрэ Балдар Балданов уонна сунтаардар бэйэбит киэн туттар кыыспыт — оҕунан ытыыга Арассыыйа успуордун маастара, Арассыыйа хас да төгүллээх чөмпүйүөнкэтэ, эдэрдэргэ Арассыыйа сүрүн хамаандатын чилиэнэ Мария Тараярова кыттыылаах оҕунан ытыыга маастар-кылаас ыытылынна.
Сунтаар улууһун саха төрүт оҕунан ытыы федерациятын салайааччыта Артем Яковлев, оҕунан ытыы тириэнэрэ Ньургуйаана Петрова көрдөһүүлэрин быһа гыммакка, Мииринэй куоракка бу күннэргэ ыытыллыбыт оҕунан ытыыга бүтүн Арассыыйатааҕы күрэхтэн ааһан иһэннэр улууспут охчуттарыгар олус туһалаах сүбэлэрин — туттар охтору, оноҕостору хайдах тутарга-харайарга, сыалы кыҥаан ытааһын араас кистэлэҥнэрин кэпсээтилэр, көрдөрдүлэр ону таһынан араас ыйытыыларга эппиэттээтилэр.
Маастар-кылааска кэлбит охчуттарбыт уонна саҥа оҕу илиилэригэр туппут дьон олус астынан тарҕастылар.
Павел КЫРЕЛОВ