Бүгүн, муус устар 25 күнүгэр «Кыталык» уһуйааҥҥа Сунтаардааҕы оҕо искусствотын оскуолата «Чёрно-белая клавиша» диэн фортепиано биэчэрин тэрийэн ыытта.
«Кыталык» уһуйаан иитиллээччилэригэр оҕо искусствотын оскуолатын фортепиано кылааһын үөрэнээччилэрэ Игнатьева Арина, Тихонова Николина уонна Марков Василий фортепианоҕа оонньоон иһитиннэрдилэр.
Маннык тэрээһин сүрүн соругунан оҕолору кыра эрдэхтэриттэн музыка кэрэ эйгэтигэр сыһыарыы, дьарыктанарга угуйуу буолар.
Оҕолор фортепиано тыаһын олус сэҥээрэн иһиттилэр. Ол курдук, биэчэр кэннэ элбэх оҕо фортепианоҕа оонньуон баҕарарын биллэрэн, Сунтаардааҕы оҕо искусствотын оскуолатын фортепианоҕа учуутала Светлана Исаеваҕа сүүрэн кэлэн: «Эһиги кылааскытыгар киириэхпитин баҕарабыт», — дэстилэр.
Оҕо искусствотын оскуолатын кэлэктиибэ үөрэнээччилэрин күүһүнэн тэриллэр маннык хабааннаах биэчэри Сунтаар үгүс уһуйааннарыгар ыытар. Ол курдук, муус устар 24 күнүгэр «Ньургуһун» уһуйаан оҕолорун көрсөн, фортепиано доҕуһуоллаах, уран эйгэлээх сэргэх тэрээһиннэрин ыыппыттара. Оттон сарсын муус устар 26 күнүгэр, оҕолор «Берёзка» уһуйааҥҥа ыалдьыттыахтара.
Дмитрий ЫМЫЧАНОВ