Сунтаар нэһилиэгин үөрэҕирии салалтатын көҕүлээһининэн сааскы каникул кэмигэр 4 оҕо уонна биир салайааччы буолан дьоллоох Дьокуускай куоракка «Безопасное колесо»диэн өрөспүүбүлүкэтээҕи күрэскэ кыттан кэллибит.
Биһиги Сунтаардааҕы А.П.Павлов аатынан 1 №-дээх оскуола 5-с кылааһын үөрэнээччилэрэ уонна салайааччыбыт Владимир Спиридонов — Юнармия, НВП начальнига буолан 29-ка айаҥҥа туруммуппут. Айаммыт ороскуотун улуус үөрэҕириитин дьаһалтата уйунна, күрэх кыттыылаахтарын «Сосновый бор» диэн санаторийга түһэртээн сытыардылар.
Бу күрэскэ уопсайа 15 улуустан 5-тэн-7-с кылааска диэри оҕолор кыттыыны ыллыбыт. Маннык күрэххэ мин маҥнайгы кыттыым, санаторийга сытан араас күрэхтэргэ кыттан билиибит-көрүүбүт кэҥээн-хаҥаан кэллэ. Араас сиртэн кэлбит оҕолору кытта билистибит-алтыстыбыт. Маннык күрэхтэр ыытыллаллара велосипедист-оҕолорго, пешеходка уопсайынан аһара туһалаах дии саныыбын. Күрэх түмүгүнэн муус устар 11 күнүгэр «Юные инспектора движения» диэн дастабырыанньа туттартаатылар. Күрэһи тэрийээччилэргэ уонна улууспут үөрэҕириитин салалтатыгар, оскуолабыт дириэктэригэр Афанасий Спиридоновичка, салайааччыбытыгар Владимир Кирилловичка, төрөппүттэрбитигэр маннык туһалаах каникулу биһиэхэ тэрийбиттэригэр махталбытын тириэрдэбит.
Кирилл КОКАРЕВ,
Сунтаардааҕы 1№-дээх оскуола 5 “а” кылааһын үөрэнээччитэ.