Бу ый саҕаланыыта Манчаары Баһылай аатынан «Модун» успуорт национальнай көрүҥнэрин киинигэр үөрэнээччилэр хабылыкка уонна хаамыскаҕа биирдиилээн уонна хамаанданан бастыыр иһин күрэхтэһиилэрэ буолан ааспыта. Манна 218 оҕо, 18 хамаанда кыттыбыта. Сунтаар улууһуттан Максимова Алена, Данилов Дьулустаан, Тимофеев Эрхан, Иванова Александра ситиһиилээхтик кыттыбыттара.
Ол курдук, Максимова Алена 1 миэстэ буолбута. Тимофеев Эрхан уолаттар бөлөхтөрүгэр 2 миэст эҕэ тахсыбыта. Онон Сунтаар оройуонун хамаандата «Хабылык» уонна «Хаамыска» национальнай остуол оонньууларыгар өрөспүүбүлүкэ күрэхтэһиитигэр үһүс миэстэни ылбыта.
Оттон олунньу 15-18 күннэригэр Дьокуускай куоракка баскетболга уолаттарга уонна кыргыттарга өрөспүүбүлүкэҕэ бастыыр иһин күрэхтэһии буолан ааста. Манна хас биирдии категорияҕа 17 хамаанда кытынна. Ыытыллар миэстэнэн — ДЮСШ-1 уонна ДЮСШ-6 «СТЕРХ» спортивнай комплекс буоллулар. Күрэскэ Сунтаар улууһуттан 10 уол, 10 кыыс көхтөөхтүк кытыннылар.
Күрэхтэһии түмүгэр уолаттар 5-с миэстэни ылан, бэйэлэрин кыахтарын көрдөрдүлэр. Кыргыттар кытаанах хапсыһыылары ааһан, 13-с миэстэни кыайа-хото туттулар.
Сунтаар улууһа 7-с миэстэҕэ таҕыста. Бу биһиги спортсменнарбыт үрдүк спортивнай таһымнарын уонна бэлэмнэрин көрдөрөр түмүк буолар.
Бары кыттааччылары уонна тренердэри эҕэрдэлиибит.
Улуустааҕы үөрэх управлениетын пресс-сулууспата