Муус устар 4 күнүгэр Сунтаардааҕы оҕо сайдар киинин иһинэн үлэлиир «Кэрэмэс» театральнай куруһуок оҕолоро, Татьяна Игнатьева салайааччылаах Дьокуускай куоракка «Синяя птица» күрэскэ кыттыыларын көрдүм.
Көрүү күрэс тиэмэтэ Кыайыы 80 сылыгар аналлаах эбит. Биһиги оҕолорбут «Сиргэ таптал» диэн Борис Гаврильевич Саввинов кинигэтиттэн, сэрии саҕана Бордоҥҥо тэриллибит «Марба» детдомун оҕолорун туһунан ахтыыга олоҕуран испэктээк туруордулар. Испэктээги көрө олорон, эмээхситтэр, ийэм кэпсээннэрин санаан, ону илэ көрөр курдук турукка киирэн хараҕым ууланан ылла. Ол курдук оҕолорбут барахсаттар ис дууһаларыгар киллэрэн, мин санаабар, чаҕылхайдык ойуулаан көрдөрдүлэр. Ити барыта уһуйааччыттан тутулуктаах. Татьяна Ильиничнаҕа баҕарабын элбэх айымньылаах үлэни, оҕо сайдар киинигэр, араас эйгэни хабан, кэнчээри ыччаты үүнү, сайдыы суолугар сирдии туралларыгар.
Сидорова Р.Е.-Ымыычаана