Оскуола үөрэнээччилэрэ күһүҥҥү сынньалаҥнарын интэриэһинэйдик, уратытык атаараллар. Ол курдук, Сунтаарга оҕо тэрилтэлэрэ сынньалаҥы, үөрэҕи дьүөрэлээн араас дьарыктары ыыталлар. Ол курдук, Н.М.Родионова аатынан оҕо дьоҕурун сайыннарар киин “Перезагрузка” диэн хас да хайысханан үлэлиир күнүскү лааҕыр тэрийэн ыытта.
Манна 99 оҕону хабан повар, муода, уруһуй, робототехника, киинэ, парикмахер, полиция хайысхаларынан дьарыктаатылар. Айар-тутар хайысхаҕа оҕолор “Сунтаар ытык сирдэрэ” диэн научнай үлэнэн дьарыктаннылар, иискэ уһуйулуннулар, көхтөөх оҕолору түмэн үөрэттилэр.
Күннэтэ оҕолор тото-хана аһаатылар, араас оонньуулары оонньоотулар, ырыа ыллаатылар, үтүө санааланыы аахсыйатыгар кытыннылар, Сунтаар бэлиэ сирдэринэн сырыттылар, успуордунан да дьарыктанан ыллылар.
Онтон “Түһүлгэ” НФК иитиллээччилэрэ дойду тэбэр сүрэҕэр Москва куоракка күрэскэ кытта бараары сылдьар буоланнар күннэтэ үҥкүүлэрин чочуйдулар. 
Оҕолор кыттыахтаах көстүүмнэрин бэйэлэрэ ситэрсэн-хоторсон биэрэллэрэ хайҕабыллаах. Кыргыттар дьарыктаналларын быыһыгар оҕуруо тиһэн көмөлөһөллөр.
Сунтаардааҕы политехническай лиссиэй үөрэнээччилэрэ күһүҥҥү сынньалаҥнарын кэмигэр аҕам саастаах дьону компьютерга, мобильнай сыһыарыыларынан туттарга үөрэттилэр,
ону тэҥэ, телефон түөкүттэриттэн харысхаллаах буоларга, “госуслуганан” туттарга уо.д.а туһалаах саҥа ньымалар тустарынан билиилэрин үллэһиннилэр.
Айар студиялар оҕолор дьоҕурдарын, талааннарын, сатабылларын, билиилэрин хаҥатар сайыннарар маастар- кылаастары, үөрэхтэри ыыттылар.
Бу нэдиэлэ устата араас сирдэринэн оҕо сынньалаҥын туһалаахтык атаарарын курдук тэрээһиннэр тиһигин быспакка ыытыллаллар.
Мира АФАНАСЬЕВА
