Бүгүн Кэмпэндээйитээҕи олохтоох бибилэтиэкэҕэ Саха сиригэр улуу нуучча тылын күнүгэр аналлаах кэмпириэнсийэ-уруок буолан ааста. Үөрэнээччилэр бастаан Саха сиригэр М.Е. Николаев уурааҕа хаһан, тоҕо тахсыбытын, М.В. Ломоносов туһунан, Ил Дархан Айсен Николаев бу күҥҥэ анаммыт эҕэрдэтин туһунан билистилэр. Онтон учуутал Валентина Федорова аныгы нуучча тылын туругар аналлаах оонньуу кэмпириэнсийэни иилээн-саҕалаан ыытта. Оҕолор үс хамаандаҕа арахсан: «Суруналыыстар», «Суруйааччылар», «Тыл үөрэхтээхтэрэ», сорудахтары толорон, нуучча тылын туһунан бэйэлэрин санааларын, толкуйдарын эттилэр, мөккүстүлэр, куолулаатылар. Аныгы нуучча тыла сайдарыгар туох мэһэй баарын, туох сайыннарарын, туттуллубат тыллар сүтүүлэрин, саҥа тыллар киириилэрин ырытыстылар. Биһиги сахабыт тыла нуучча тылын байыппытын олус үөрэ иһиттилэр. Бу — сахалар олорор сирдэрбит ааттара эбит: Ыгыатта, Ытык Күөл, Ыллымах, Ынахсыт уонна Ыһыахпыт. Түмүккэ оҕолор нуучча тылыгар анаммыт кинигэ быыстапкатын кытары билистилэр.
Татьяна МЕСТНИКОВА.
