Бүгүн ахсынньы 29 күнүгэр А.И.Иванов аатынан успуорт олимпийскай эрэллэри бэлэмниир манеһыгар, Сунтаар улууһа бэйэни салайыныы 20 сылыгар аналлаах улууспут дьаһалталарын үлэһиттэригэр нэһилиэктэр икки ардыларынааҕы бэстибээл буолла.
Тэрээһин нэһилиэктэр парадтаан хааман киириилэринэн саҕаланна. Хамаандалар бары бэлэмнэнэн кэлбиттэрэ харахха быраҕыллар. Улууспут аҕа баһылыга Анатолий Григорьев эҕэрдэ истиҥин, баҕа санаа бастыҥын этэн туран бэстибээли арыйда. Бу манна барыта 25 хамаанда кытынна. Ол курдук, дуобат, бинтиэпкэнэн ытыы, тиэнис, хаамыска, хабылык, дартс күрэхтэрэ олус сэргэхтик ааста. Маны сэргэ, «Сандалы» булт аһын быыстапката тэрилиннэ. Сиэдэрэйдик киэргэтиллэн бэлэмнэммит ас, алаадьыттан саҕалаан кус, собо, сордоҥ, сыалыһар, тииҥҥэ тиийэ булт аһын арааһын дьүүллүүр сүбэ сыаналаата. Түмүккэ 1-кы миэстэ – Күүкэй сандалыта, 2-с миэстэ – Сунтаар нэһилиэгэ, 3-с миэстэ Бүлүүчээн, Дьаархан буоллулар. Саамай ураты күрэҕинэн «Бастыҥ тоҥ балык кыһааччы БАҺЫЛЫК» күрэх буолла. Кыттааччылар тоҥ балыгы икки мүнүүтэ иһигэр үрдэл оҥорон сааһылаан уураллар. Кыайыылаах ким саамай үрдүк үрдэли сааһылаабытынан быһаарылынна. Барыта 9 баһылык кыттан 1-кы миэстэни-Петр Тимофеев , Дьаархан нэһилиэгин баһылыга ылла, 2-с миэстэни Александр Романов, Сиэйэ нэһилиэгин баһылыга, 3-с миэстэ Иван Игнатьев, Уһун-Күөл баһылыга буолла. Ону тэҥэ, салайааччыларбыт маннык тэрээһини тэрийэн кыттыыны ылаллара үтүө холобур буолар. Улууспут аҕа баһылыга Анатолий Григорьев тыҥааһыннаах теннис күрэҕин түмүгүнэн 1-кы миэстэни эрэллээхтик ылла.
Күрэх уопсай түмүгүнэн 1-кы миэстэни Түбэй нэһилиэгэ ылла, баһылык Павел Павлов, 50 тыһ. харчынан туоһу суругунан наҕараадаланна, 2-с миэстэни Дьаархан, баһылык Петр Тимофеев, 30 тыһ. наҕараадаланна, 3-с миэстэ Тойбохой, баһылык Станислав Егоров 20 тыһ. ылан үөрүүлэрэ үксээтэ.
Сылы түмүктүүр биир бастыҥ тэрээһин үрдүк таһымнаахтык ааһан кыайыылаахтар, кыттааччылар сүргэлэрэ көтөҕүллэн тарҕастылар. Инникитин да маннык тэрээһиннэр ыытыллан айарга-тутарга кынат буоллуннар диэн баҕа санаабытын тиэрдэбит.
Петр Тимофеев, Дьаархан нэһилиэгин баһылыга.
Сергей Саввинов, Маар-Күөл нэһилиэгин баһылыга
Юрий Прокопьев, Күүкэй нэһилиэгин баһылыга
«Сунтаар сонуннара» улуус хаһыата