Сунтаар нэһилиэгин «Партизан» норуот айымньытын театрилизованнай киинэ үгүс ахсааннаах бырайыактары толкуйдаан, олоххо киллэрэн, дьону соһуталлар. Холобур, киин үлэһитэ Роман Амонов толкуйдаабыт “Назад в СССР” диэн бырайыага дьон-сэргэ сэҥээриитин туппута ыраатта. Бу бырайыак чэрчитинэн «партизаннар» сылын аайы Норуоттар сомоҕолоһууларын күнүгэр бэйэ бэйэлэригэр хатыламмат тэрээһини толкуйдууллар. Кулууптарбыт быйылгы «Назад в СССР» бырайыактарыгар тугу толкуйдаабыттара буолуой диэн үгүс киһи бу күнү күүппүт буолуохтаах.
Күүтүүлээх кэммит, сэтинньи 4 күнэ үүнэн, кулууп дьиэҕэ элбэх киһи муһунна. Быйылгы «Назад в СССР» тэрилтэлэр икки ардыларыгар күрэс быһыытынан ыытылынна. Көрөөччүлэр үс тэрилтэ — «Туллукчаан», «Березка» оҕо саадтара уонна С.А.Зверев-Кыыл Уолун аатынан норуот айымньытын киинин үлэһиттэрэ түөрт түһүмэхтээх күрэскэ күөн көрсүһүүлэрин олус сэргии көрдүбүт. Кыттааччыларбыт бэркэ бэлэмнэммиттэр.
Холобур, «Коммуналка» диэн ааттаах «Туллукчаан» үлэһиттэрэ аан бастакыттан көрөөччүлэргэ сөбүлэттилэр, кинилэр хас биирдии толорууларын дьон биһирээбитин дохсун ытыс тыаһынан биллэрдэ. Көрөөччүлэр хас биирдии нүөмэрдэрин олох анал үөрэхтээх режиссер толкуйдаан, дьонун аттарын туруорбут диэн санаабыттар, ол режиссер ким эбитэ буолла диэн толкуйга түстүбүттэр. Үгүс киһи арааһа, норуот тыйаатырыгар үлэлиир анал үөрэхтээх режиссер толкуйдаабыт быһылаах диэн эмиэ да «уорбалыы» санаабыт эбит. Суох, оннук буолбатах. Ону күрэс түмүгэр режиссер үөрэхтээх, кулууп дириэктэрэ, бу күн дьүүллүүр сүбэҕэ үлэлээбит Юрий О «олох чиэһинэ билиниҥ» диэн «ыххайан» туран ыйыппытыгар, кэлэктиип бэйэтэ бары биир санааҕа киирэн толкуйдаабыттарын эттилэр. Дьэ, кэлэктиип биир сомоҕо буолан үлэлиирэ мантан эмиэ көстөр.
С.А.Зверев-Кыыл Уолун аатынан киин үлэһиттэрэ бэйэлэрэ улуус, нэһилиэк, өрөспүүбүлүкэ таһымнаах араас тэрээһиннэри күннэрин-түүннэрин аахсыбакка туран тэрийэр «күн солото суох» дьон диэтэххэ, бу күрэскэ эмиэ сүрдээҕин табыллан кытыннылар. Хаһан, хантан соло, бириэмэ булан бэлэмнэммиттэрэ буолуой? диэх курдук.
Оттон «Березка» уһуйаан үлэһиттэрэ да сцена тахса үөрүйэхтэрэ харахха быраҕыллар. Ордук, көрөөччүлэр да, күрэһи иилээн-саҕалаан ыыппыт Роман Амонов да бэлиэтээбитинэн, сэбиэскэй кэм саҕанааҕы муоданы көрдөрүүгэ урукку таҥастары хантан булан, ким ууруна сыппытын кэтэн, сыанаҕа хаамтылар диэн интэриэһиргээтибит.
Быһатын эттэххэ, күрэс кыттыылаахтара хас биирдии сорудаҕы сүрдээх интэриэһинэйдик толкуйдаан, бэйэлэрин хамаандаларын чиэстээхтик көмүскээтилэр.
Дьүүллүүр сүбэ маны барытын бэлиэтээн туран, ханнык тэрилтэ хаһыс буолбутун биллэрдилэр. Бары сэрэйбиппит курдук да буолла. Ол курдук, бастакы миэстэни «Туллукучаан» оҕо саада, иккиһи норуот айымньытын киинин үлэһиттэрэ ыллылар. Үһүс миэстэҕэ «Березка» кэлэктиибэ таҕыста. Кыайыылаахтарга улуус урбаанньыттара — «Татыйыына», «Корона», маҕаһыынар, «Кириэстээх» тыа хаһаайыстыбатын кэпэрэтиибэ, нэһилиэк дьокутааттарын сэбиэтэ туруорбут сыаналаах бириистэрин, харчынан сэртипикээттэри туттардылар. Бастаабыт хамаанда Саҥа дьыллааҕы бырааһынньыктарын «Партизан» кулуубар босхо бэлиэтиир бырааптаннылар.
Аны көрөөччүлэргэ киирии билиэтинэн оонньуу буолла. Манна хас да киһи ас наборун сүүйэн ылла. Саамай сүрүн бириис – биир сылга кулуупка ыытыллар тэрээһиҥҥэ босхо сылдьарга «көмүс карта». Сүрүн бириис урукку өттүгэр кулууп бэйэтин тэрээһинигэр сылдьарга буоллаҕына, быйылгы атын, кэлии да артыыстар кэнсиэртэригэр, бэл циркаҕа кытары босхо сылдьар быраабы ылыы. Оннук быраабы бааттаах көрөөччү сүүйэн, үөрүүтэ үксээтэ.
Дьэ, бу курдук, «Партизан» НАТК кыттааччылардыын, көрөөччүлэрдиин, тэрийээччилэрдиин бары да дуоһуйа, астына сынньанныбыт. Фойеҕа тэриллибит фотозонаҕа хаартыска түһэн бу күммүтүн үйэтиттибит, буфеттан кисиэл, хара килиэп, ириис кэмпиэт, икралаах сымыыт — барытын 50 эрэ солкуобайга атыылаһан үссэннибит.
«Назад в СССР» күрэһи Октябрина Афанасьева, Анна Трифонова, Степан Егоров, Айсен Федоров, Роман Амонов ылбаҕай ырыаларынан киэргэттилэр. Оттон Юлия Филиппова салайааччылаах Сунтаардааҕы Оҕо искусствотын оскуолатын «Эдельвейс» академическай ырыа,уонна Виктория Мойтохонова салайааччылаах «Мозаика» оҕо образцовай ансаамбыллара орто, саастаах көлүөнэ олус сөбүлээн ыллыыр ырыабытынан күрэһи астылар.
Яина ВЛАСЬЕВА