АЛРОСА хампаанньа Арассыыйаҕа тустуу федерациятын кытары бииргэ үлэлэспиттэрэ хаһыс да сыла.
АЛРОСА хампаанньа тэрийэн ыытар «Настроение АЛРОСА» бэстибээл чэрчитинэн дойду аатырбыт спортсменнара уонна араас таһымнаах чөмпүйэнээттэр кыайыылаахтара улуустарынан сылдьан маастар-кылаастары ыыталлар. Чөл, доруобай олоҕу пропагандалылыыллар, ону сэргэ кэнчээри ыччаты успуорка угуйаллар.
Ол курдук, биһиги улууспутугар ахсынньы 6-7 күннэригэр «Настроение АЛРОСА» чэрчитинэн улахан успуорт салайааччылара уонна биллиилээх спортсменнар: АЛРОСА култуурунай-спортивнай комплексын дириэктэрин солбуйааччыта Зелимхан Кцоев, Арассыыйа спортивнай тустуутун Федерациятын толорооччу дириэктэрэ Роман Гайдуков, РФ успуордун үтүөлээх маастара, Арассыыйа спортивнай тустуутун Федерациятын көҥүл тустууга отделын салайааччыта Петр Юмшанов, Арассыыйа аан дойдутааҕы кылаастаах успуордун маастара, Арассыыйа чөмпүйүөнэ, аан дойду боруонса призера, Д.П.Коркин уонна И.С.Ярыгин турнирдарын элбэх төгүллээх кыайыылааҕа Евгений Жербаев, РФ успуордун үтүөлээх маастара, Олимпиада үрүҥ көмүс призера, аан дойду уонна Европа чөмпүйүөнэ Алена Карташова кэлэн үлэлээн бардылар.
Бастакы күннэригэр улууус баһылыга Анатолий Григорьевы кытары көрсүһүүттэн саҕалаатылар. Улууспут баһылыга ыалдьыттарга тустууга ситиһиилэр тустарынан билиһиннэрдэ. Успуорт бу көрүҥэ сайдыытыгар бэйэтин көрүүлэрин кэпсээтэ.
Ол кэннэ А.И.Иванов аатынан олимпийскай эрэллэри бэлэмниир оскуола манеһыгар кэлэн эдэр тустууктар киэһээҥи дьарыктарыгар түбэһэн маастар-кылаас ыыттылар. Тустуу албастарын көрдөрдүлэр. Тустуук уолаттар үгүс ыйытыыларыгар хоруйдаатылар, элбэх сүбэ-ама биэрдилэр. Бу көрсүһүүттэн биһиги улууспут эдэр бөҕөстөрө элбэҕи биллилэр, инникитин биллиилээх спорсменнар сүбэлэрин, көрдөрбүүт ньымаларын бэйэлэригэр туһаныахтара турдаҕа.
Иккис күнүгэр Элгээйи нэһилиэгэр сылдьан айылҕа мусуойун көрдүлэр, успуорт бу көрүҥүн фанаттарын кытары көрсүстүлэр.
«Сунтаар сонуннара» хаһыат