Төлөннөөх сүрэхтээх пионер баһаатай, учуутал, өр сылларга салайааччынан үлэлээбит Надежда Родионова төрөөбүтэ 80 сылынан уонна оройуоннааҕа Пионердар дьиэлэрэ төрүттэммитэ 65 сылынан «Зажигая сердца детей: от пионерии и комсомола до новой системы детского движения в Российской Федерации» методическай конкурска сэттэ хамаанда кытынна.
Хамаанда 4 киһиттэн турар (дириэктэри иитэр үлэҕэ солбуйааччы, дириэктэр сүбэһитэ, педагог-организатор, кылаас салайааччыта, оскуола лидерэ (7-8 кыл. үөрэнээччитэ) биир нэдиэлэ устата кэтэхтэн сорудахтары толордулар. Ол курдук, пионерия азбукатын оҥордулар, В.Шаинскай музыкатыгар М.Пляцковскай тылларыгар суруллубут “Улыбка» ырыаны ыллаан видеоҕа устан ыыттылар, викторинаҕа эппиэттээтилэр, «Инникибит бүгүн саҕаланар. Коммеморация” бырайыактыыр үлэни толордулар. Методическай күрэс түмүктүүр түһүмэхтэригэр хамаандалар иккилии буолан үөрэҕирии түмэлигэр Альбина Иванова музейнай уруогар сылдьан баран сорудахтары толордулар, аҥардара Илья Иванов аатынан Сунтаардааҕы 2 №-дээх оскуола үөрэнээччилэригэр “Ойор-тэбэр, оонньуур оҕо саас” диэн көрдөөх, үҥкүүлэтэр-оонньотор аралдьытар тэрээһини ыыттылар. Ыччат дьиэтигэр начальник Трофим Ивановтан сорудах ылан, аныгыскы үөрэх дьылыгар оскуола уонна ыччат салаата бииргэ үлэлээн олоххо киллэрэр үлэлэрин былааннаатылар. Улуус дьаһалтатыгар дьокутааттар сэбиэттэрин бэрэссэдээтэлэ Ульяна Попова, улуус баһылыгын социальнай уонна имиджевай бэлиитикэҕэ солбуйааччы Гаврил Еремеев, үөрэҕирии салалтатын начальнига Альберт Иванов, улуустааҕы саллааттар ийэлэрин, кыраайы үөрэтээччилэрин түмсүүтүн кыттыылааҕа Галина Лидочен, «Ньургуһун» айар түмсүү салайааччыта Августина Попова кыттыылаах пресс-конференцияҕа хамаандалар киэҥ ис хоһоонноох кэпсэтиилэрэ ыытылынна. Бары түһүмэхтэри түмэн сыаналыырга дьүүллүүр сүбэҕэ Надежда Михайловна аймахтара, ыччат, үөрэҕирии салаатын, улуус дьаһалтатын сүрүннүүр исписэлиистэрэ, Сунтаардааҕы оҕо дьоҕурун сайыннарар киин педагогтара үлэлээтилэр уонна түмүгү таһаардылар.
Муҥутуур кыайыылаах хамаанда — Сунтаардааҕы политехническай лиссиэй (Венера Васильева, Саргылаана Иванова, Мария Григорьева, Алеша Попов) буоллулар уонна Надежда Михайловна бииргэ төрөөбүттэрэ туруорбут 20 тыһ. солк. бириистэрин ыллылар.
1 ист. Диплом – “А.П.Павлов аатынан Сунтаардааҕы 1 №-дээх орто оскуола” хамаандата (Дмитрий Михайлов, Айгыына Тотонова, Марианна Семенова, Амина Лукиянчук)
2 ист. Диплом – “Г.Е.Бессонов аатынан Тойбохойдооҕу орто оскуола” хамаандата (Мария Данилова, Альбина Иванова, Александра Михайлова, Лена Егорова)
3 ист. Диплом – “И.С.Иванов аатынан Сунтаардааҕы 2 №-дээх орто оскуола” хамаандата (Розалия Еремеева, Александра Данилова, Марина Крыжановская, Стас Понамарев)
Биһирэбил бириистэринэн “Академик М.Н.Анисимов аатынан Түбэй агротехнологическай хайысхалаах орто оскуолата” (Анастасия Винокурова, Федор Чахов, Анжелика Иванова, Юрий Борисов) уонна “П.Х.Староватов аатынан Элгээйитээҕи орто оскуола” хамаандата (Вячеслав Сафонов, Айгыына Игнатьева, Юлия Лаптева, Аркадий Константинов) бэлиэтэннилэр. Методическай конкурска барыта 46 тыһ. солк. уонна өйдөбүнньүк бириистэри олохтообут улуус дьаһалтатыгар, үөрэҕирии салалтатыгар, үөрэх үлэһиттэрин идэлээх сойуустарын кэмитиэтигэр, Надежда Михайловна үөрэнээччилэригэр, аймахтарыгар, үлэлээбит Илья Иванов аатынан Сунтаардааҕы 2 №-дээх орто оскуола кэллэктиибигэр тэрийээччилэр ааттарыттан истиҥ сүрэхтэн тахсар махталбытын тиэрдэбит.
Пионерскай-комсомольскай оҕо-ыччат тэрилтэлэрин ситимниир билиҥҥи көлүөнэ саҥа хамсааһыннара кэрэҕэ, сырдыкка иитэ-үөрэтэ, сирдии турдун.
Айна ЯКОВЛЕВА,
Н.М.Родионова аатынан Сунтаардааҕы оҕо дьоҕурун
сайыннарар киин тэрийээччи-педагога