Олунньу 27 күнүгэр Кириэстээхэ Мэҥэ-Хаһалас улууһун 19 киһилээх делегацията кэлэн өрөспүүбүлүкэҕэ бөдөҥ «Кириэстээх» ТХПК үлэтин-хамнаһын билсэ, уопут атастаһа кэлэ сырыттылар.
Бөлөҕү Мэҥэ-Хаҥалас улууһун баһылыга Дмитрий Тихонов иилээн-саҕалаан илдьэ сылдьар. Кинини кытта улуус бас-көс дьоно- оройуон мунньаҕын бэрэсэдээтэлэ Иннокетий Андросов, биэс нэһилиэк баһылыктара уонна хас да хаһаайыстыба салайааччылара бааллар.
Ыалдьыттары Сунтаар улууһун баһылыга Анатолий Григорьев, улуус баһылыгын экономическай сайдыыга солбуйааччыта Борис Васильев,тыа хаһаайыстыбатын салалтатын салайаччыта Владимир Анисимов арыаллыылар.
Кириэстээх дьоно-сэргэтэ, нэһилиэк баһылыга Александр Григорьев ыраахтан кэлбит ыалдьыттары үгэс быһыытынан бөһүөлэк киирэр аартыгар арыылаах алаадьылаах,кымыстаах,итии чэйдээх көрүстүлэр.
Бөлөх сүрүн сыала-соруга хаһаайыстыбалар үлэлэрин көрүү,уопут атастаһыы буолар. Ол иһин тутатына ыалдьыттар «Кириэстээх» ТХПК, Куокунутааҕы отделение үлэтин көрө аастылар. Онтон кэлэн иһэн Үлэ Дьоруойа В.А.Михайлов үлэлиир ферматыгар сырыттылар.
ТХПК салайааччыта В.С.Егоров кэлбит ыалдьыттарга салайар хаһаайыстыбатын үлэтин-хамнаһын сиһилии билиһиннэрдэ.
Бу күн түмүк кэпсэтиитэ Кириэстээх култуура киинигэр буолла. Манна Владимир Семенович хаһаайыстыба үлэтин,экономическай ааҕыыларын,үлэ көрдөрүүтүн көрдөрөр презентациятын көрдөрдө. Уопуттаах хаһаайыстыбанньык үлэтин кэлбит ыалдьыттар сэргээн иһиттилэр,интэриэһиргиир боппуруостарыгар харда ыллылар.
Саха дьоно ханна да буоларын курдук өрүү өттүк харалаах,кэһиимсэх идэлээх,ол сиэринэн хаһаайыстыба аатыттан салайааччы бэлэхтэри туттартаата,өссө да субу курдук көрсүһүүлэр,кэпсэтиилэр буола туралларыгар баҕа санаатын эттэ.
Тыа сирин дьоно сүөһү-сылгы иитэн,нэһилиэнньэни сибиэһэй аһынан хааччыйан,эмис эти дэлэтэн,үрүҥ аһы үрүйэлии сүүрдэн,олохтоох бородууксуйанан хааччыйан,күн бүгүнүгэр диэри хара үлэттэн илиилэрин араарбакка үлэлии сылдьар тыа сирин үлэһит дьонун күннээҕи түбүктээх үлэлэрэ махталлаах.
Ханнык да салааҕа бу курдук көрсүһүүлэр,кэпсэтиилэр,бэйэ-бэйэҕэ ыалдьыттаһан саҥаны билии,уопут атастаһыы сөптөөҕүн улууспут баһылыга Анатолий Григорьев бэлиэтээн эттэ,хардарыта билсэ-көрсө ,ситимнээхтик үлэлииргэ икки улуус аҕа баһылыктара кэпсэтэн илии тутустулар.
Кириэстээх баһылыга Александр Григорьев нэһилиэккэ барар үлэни,саҥа тутууну,нэһилиэкпит историятын,биллиилээх дьоммут,тыа хаһаайыстыбатынан дьарыктанааччылары,үөрэҕирии,култуура о д а күннээҕи нэһилиэк олоҕуттан кэпсээтэ. Кириэстээх сиригэр-уотугар ыалдьыттаабыттарын бэлиэтээн өйдөбүнньүк бэлэхтэри туттарда.
Түмүккэ, Үлэ Дьоруойа В.А.Михайлов кэлбит ыалдьыттарга үлэлэригэр ситиһиилэри,тус олохторугар дьолу-соргуну баҕарда уонна маннык көрсүһүүлэр өссө да буола туралларыгар баҕа санаатын этэн сөбүлүүр ырыатынан түмүктээтэ.
Дьэ, ити курдук Манчаары дойдутуттан ,сэттэ дьоруойдаах ,үтүө-үлэһит дьоннордоох Ытык Мэҥэ-Хаҥалас сирин чулуу уолаттара,салайааччылара Алмаас таас аан бастаан көстүбүт Кэрэ Кириэстээх сиригэр ыалдьыттаан аастылар.
Бөлөх өттүттэн харда тылы Мэҥэ Хаҥалас улууһун баһылыга Дмитрий Тихонов эттэ: «Биһигини чугас уруугут,убайгыт,бырааккыт ду курдук истиҥник көрсүбүккүтүгэр ис сүрэхпититтэн махтанабыт»диэн этиитинэн ыалдьыттарбытын атаардыбыт.
Тыабыт сирэ үүнэ-сайда турдун!
Августина ПЛАТОНОВА
